Ju merrni çdo ditë kaq shumë informacion për aktivitetin fizik dhe mënyrën sesi të arrini objektivat tuaja sa ndonjëherë e ngarkoni trurin me më shumë gjëra nga ç’duhet.
Pavarësisht çdo liste me rregulla, e vërteta universale në këtë temë është që: aktiviteti fizik është gjithmonë i mirë! Tani, meqë jemi në prag të shtatorit – muaji i rikthimit në palestër- me siguri po pyesni veten: “Sa herë duhet të ushtrohem gjatë javës?”
Një përgjigje e sinqertë do të ishte: varet nga objektivat e tua, stili i jetës dhe trupi i gjithsecilit. Secili prej nesh është ndryshe prandaj dhe axhenda e aktivitetit fizik duhet të jetë e ndryshme.
Sidoqoftë, ka disa këshilla që sipas ekspertëve duhet t’i keni parasysh nëse e keni ndarë mendjen që këtë vit do arrini objektivat që i keni vendosur vetes.
Sipas tyre, të rriturit duhet të bëjnë nga 150-300 minuta aktivitet fizik në javë! Ose thënë ndryshe, 30 minuta me intensitet të moderuar çdo ditë, që në fund të javës të keni plotësuar 210 minutëshin. Studimet e kryera pasi vëzhguan rreth 116,221 për 30 vite, arritën në përfundimin se njerëzit më aktivë fizikisht, kanë më pak rrezik të vdesin nga problemet kardiovaskulare apo shqetësime të tjera.
Pra, sa herë në javë duhet të shkoni në palestër?
Të paktën 3 herë në javë, më pak mos e konsideroni. Nëse zgjidhni të ushtroheni më shpesh, planifikoni të ndryshoni intensitetin e aktivitetit tuaj, për të mos abuzuar dhe për të lejuar që trupi ta rimarrë veten.
Sa i gjatë duhet të jetë aktiviteti fizik?
Nga 30-90 minuta dhe sërish varet nga intensiteti i ushtrimeve tuaja.
