Nga Ilir ALLKJA
Çfarë mund të ndodhë ndryshe zotërinj partizanë që shpikni e zbatoni politika shëndetësore që as në kohën e Enver Hoxhës nuk ishin kaq antipopullore e antimjekësore!
Ju zotërinj partizanë keni linçuar publikisht mjekë e infermierë vetëm sepse kanë kërkuar përmirësime në sistem, në favor të shëndetit të pacientëve dhe ushtrimit të profesionit.
Në kohën e merhumit asnjë mjek nuk hiqej nga puna për bindje të ndryshme, thjesht e transferonin nëpër zona malore, por e mbanin në punë, ndërsa ju të hiqni të gjitha mundësitë e jetesës nëqoftëse nuk duartroket për liderin tuaj.
Ju lëvdoheni me “mjekësinë falas” apo “mjekësinë e gjeneratës tjetër ” por realisht gjenerata e sotme e shqiptarëve po vuan skajshëm e po vdes me shërbim sakat ose edhe pa shërbim mjekësor.
Arsyet: kostot e larta të egzamimimeve e trajtimeve, mungesa e mjekëve/specialistëve dhe infermierëve në qindra fshatra e disa qytete të vogla, mungesa e pajisjeve, kufizimi i frikshëm për analiza laboratorike për të shtruarit në spitale për shkak të kostos së lartë të konçensioneve tuaja vjedhëse, etj, etj.
STATISTIKAT ( shikoni Eurostat, për më shumë); A jeni në gjendje të na thoni se:
– Përse është rritur vdekshmëria foshnjore dhe vdekshmëria amtare në vitet e qeverisjes tuaj?
– Përse është ulur numri i shtretërve spitalorë për banorë këto vite?
– Përse janë mbyllur spitalet bashkiakë e janë kthyer në qendra shëndetësore?
– Përse është ulur frikshëm numri i mjekëve e infermierëve për banorë duke na vënë përkrah Somalisë e vendeve të tjera afrikane ???
Pse, zotërinj?
Dhe më kryesorja përse Shqipëria, vendi jonë ka numrin më të lartë të policëve për 1000 banorë, ndërkohë që krimi e korrupsioni janë bërë litar e mullar??
