Nga Edon KUQI
1 Qershori është një nga ditët më të rëndësishme për vogëlushët kudo në botë pasi është nga ato ditët ku e gjithë vëmendja është tek ata. Në shumë vende të botës krahas festës kjo festë shërben edhe si një protestë për të gjithë ata fëmijë që nuk mund të festojnë, diku nga lufta e diku nga varfëria. Po kthehem tek fëmijët e qytetit tim, tek ata fëmijët e vegjël, të zgjuar e të ditur që sot u “dënuan” dy herë nga pushteti lokal dhe Drejtoria Arsimore e Rrethit Kurbin.
Janë fëmijët e vetëm që sot u privuan nga një festë që e meritojnë, po them për një festë të vërtetë me shfaqje, me aktivitete që në fakt na zbulojnë edhe talentet e reja që do lindin në një qytet që po braktiset çdo ditë nga të rinjtë. Janë dënuar tashmë prej shumë e shumë vitesh nga pushteti vendor, nga Bashkia e Kurbinit që kurrë nuk ua bëri realitet atë që ata vërtetë e meritojnë një kënd lojërash. Këndi i lojërave është më e pakta që ne mund të bëjmë për një qytet që çdo ditë po përballet me mungesë nxënësish pasi po ikin nga një vend që për fat të keq nuk ofron më asgjë.
Fëmijët e këtij vendi e meritojnë një kënd dinjitoz lojërash, një park, një lulishte siç e ka Laçi, Lezha dhe gjithë vendet në Shqipëri dhe botë. Ata meritojnë të kenë një vend argëtimi që ti japin dritë dhe shpresë një qyteti që po fiket, ku nga papunësia e varfëria e ku nga largimi për një jetë më të mirë. Kini kujdes me ata fëmijë se janë e ardhmja premtuese e atij vendi dhe unë shpresoj shumë që nesër shumë nga ata të jenë ata ose ato që ne të krenohemi me ta, u kërkojmë të jenë më të mirët dhe nuk u japim as kushtet minimale që të jenë të tillë.
E ardhmja e atij vendi është në sytë e tyre të qeshur që gjithmonë kanë ditur të na japin kënaqësi e të krenohemi me ta, prandaj sot prindër në këtë 1 Qershor përpara se ti dërgoni fëmijët në Tiranë për të festuar a në Lezhë shkoni dhe i zini derën Bashkisë dhe Drejtorisë Arsimore dhe kërkoni atë që fëmijët nuk e bërtasin dot sot por që do ua përplasin në fytyrë kur të rriten.
