Nga Red VARAKU
Qëndrimi amerikan në lidhje me projektin e minischengenit të prezantuar nga Edi Rama dhe shefi i tij Vuçiç ka qenë deri diku i vagullt gjë që ka shkaktuar shpesh dhe paqartësi në lidhje me qëndrimin e tyre të vërtetë.
Fillimisht, i dërguari special i SHBA për rajonin Mathew Palmer e ka mbështetur këtë iniciativë, por ka qenë ambasada amerikane në Berlin në nëntor të 2019 ,e cila deklaroi se iniciativa të tilla pa pjesëmarrjen e të gjitha shteteve ku përmendte në mënyrë të veçantë Kosovën, nuk ishin të mirëpritura.
Këto kanë qenë të vetmet reagime të zyrtarëve amerikanë në lidhje me këtë projekt të cilat në fakt kanë qenë ambigue dhe joserioze. Arsyet se pse kanë qenë të tilla lidhen me një përpjekje të SHBA për të anashkaluar rolin e BE në rajon. Në përgjigje të kësaj përpjekje BE pezulloi procesin e integrimit në rajon duke bllokuar dhe negociatat për Shqipërinë dhe Maqedoninë.
Kjo me sa duket ka sjellë dhe reagimin e sotëm të Departmentit të Shtetit ,institucionit më të rëndësishëm amerikan në politikën e jashtme, i cili e qartësoi përfundimisht çdo aludim në lidhje me qëndrimin amerikan.
Në deklaratën e DASH të publikuar nga Zëri i Amerikës, integrimi i rajonit në BE është parësor dhe i padiskutueshëm.
SHBA mbështet çdo i iniciativë që synon Tregun e Përbashkët Rajonal, (ky i fundit është produkt i Procesit të Berlinit), por me kushtin e pagenogociueshëm të gjithëpërfshirjes.
Pra, DASH kërkon gjithëperfshirje si kusht kryesor dhe mbështet vetëm projektet që kanë si objektiv realizimin e Tregut të Përbashkët Rajonal dhe asnjë iniciativë tjetër
Ky qëndrim është në fakt identik me qëndrimin e Gjermanisë dhe jo rastësisht erdhi menjëherë pas deklaratës së zëdhënësit të Kancelares Gjermane Angela Merkel.
Në këtë kuptim është një lajm i madh, sepse më në fund kemi një qëndrim të qartë dhe të unifikuar të SHBA dhe BE në lidhje me rajonin.
Kemi një rikthim tek ideja që çdo iniciativë rajonale duhet të ndërmerret nën mbikqyrjen e rreptë të BE dhe kemi një rikthim tek objektivi më i rëndësishëm që është
integrimi i këtij rajoni në BE.
Kjo do të thotë që koha e zyrtarëve sharlatanē amerikanë, të cilët rrëzuan me dhunë një kryeministër legjitim si Albin Kurti dhe mbajtën me dhunë në pushtet një autokrat të korruptuar si Edi Rama ka marrë fund.
Kjo do të thotë që aventurat e rrezikshme që synonin të krijonin një hapësirë influencash Ruso-Kineze , e cila mund të kthehej në rrezik serioz për rajonin dhe për pasojë vetë BE-në, kanë marrë një goditje përfundimtare.
Të shpresojmë që këto deklarata të shënojnë një moment kthese në rikthimin e stabilitetit dhe normalitetit në rajon dhe të hapin rrugën drejt integrimit europian të këtij rajoni në BE.
