Nga Red VARAKU
Steffen Seibert, zëdhënës i kancelares Amgela Merkel deklaroi sot se është qartazi në përkrahje të plotë të Tregut të Përbashkët Rajonal (TPR).
Këtë deklaratë tani e merr Rama, e transformon dhe e servir në mënyrë qesharake për opinionin publik si mbështetje të Gjermanisë për iniciativën private Rama-Vuçiç, Ballkan i Hapur, ku bëjnë pjesë vetëm tre nga gjashtë shtetet e BP.
Tregu i Përbashkët Rajonal është një produkt i Procesit të Berlinit, proces që është nismë personale e Angela Merkel dhe që ka mbështetjen e të gjashtë shteteve të Ballkanit Perëndimor.
Ndërsa Ballkan i Hapur është një nismë që shkon kundër parimeve mbi të cilat operon Procesi i Berlinit. Ajo është një nismë gati private e dy individëve Rama-Vuçiç, që e shpall rajonin një hapësirë të hapur për investime të pakontrolluara Ruse dhe Kineze që kërcënojnë ekonominë dhe rrezikojnë stabilitetin e rajonit, ndaj është bojkotuar nga gjysma e shteteve.
Tani se si mund të mbështesë Gjermania një projekt që fuqizon pozitat e Moskës dhe Kinës në rajon duke rrezikuar kështu stabilitetin e rajonit dhe kësisoj vetë BE, këtë vetëm Rama dhe kokëtulët përreth tij mund ta shpjegojnë!
Kuptohet që Rama po vuan dhe po lobon fort për një mbështetje të tillë, por të spekulosh kaq banalisht me një deklaratë kaq të qartë, dëshmon dëshpërimin aktual të tij në lidhje me mbështetjen e munguar të BE për Ballkanin e Hapur.
