Nga Eduart Ndocaj, sekretar i Përgjithshëm i ADK
Bashkëkombas të mi të dashur!
Për më shumë se 30 vite po gënjehemi me “lugën bosh“ të aspiratës integruese, dhe për këtë gjë, jemi përgjegjës ne, populli i thjeshtë, i cili vazhdon të ushqehet me dënglat dhe karagjozllëqet e klasës politike shqiptare, e cila në kurrizin tonë ka ndëtuar perandorinë e pushtetit të saj të majmur me pasuri përrallore.
Masakra zgjedhore e 25 prillit, është përfundimisht “vula e turpit“ e një qeverie që pasi ka degdisur shqiptarët në kufijtë e mbijetetësës, shfrytëzon popullin që kridhet në mjerimin ekonomik dhe që nuk gjykon përtej thesit të miellit duke ua blerë votën pa më të voglën kokëcarje të ligjit apo dhe të parimeve themelore të demokracisë.
Këto zgjedhje, ishin testi real i qasjes proeuropianiste të politikës shqiptare dhe duhej të ishin dëshmi e fundit të tranzicionit të tejzgjatur, por fatkeqësisht treguan të kundërtën.
Kryenarkoqeveritari Rama, me shpurën banditeske të tij, realizuan turpshëm skenarin e blerjes masive të votive të shqiptarëve, duke mundësuar kështu mandatin e 3 qeverisës. Shqiptarët harruan zullumet e panumërta të kësaj qeverie, harruan talljen e kryeministrit langaraq që pohonte hapjen e 300 mijë vendeve të punës, kur ndërkohë shqiptarët përvitshëm largohen gjithnjë e më shumë nga Shqipëria; harruan cinizmin e “shëndetësisë falas“, ndërkohë që vendi ynë ka një shërbim shëndetësor të krahasueshëm me vendet më të varfëra të Afrikës; arsimi është në ditët e tij më zeza, mësuesit përballen me një kolaps total të politikave arsimore që vijnë si rezultat i paaftësisë së drejtuesve të dikasterit përkatës; ekonomia e vendit është në pikiatë të tmerrshme dhe sot, Shqipëria ka asfiksim total të sektorëve strategjikë, duke zhytur në krizë të thellë prodhimin vendas dhe burimet fitimprurëse.
Kjo panoramë, padyshim që i shkon përshtat oligarkëve, të cilët janë mbledhur rreth qeverisjes dhe po shijojnë thelat e pushtetit.
Miqtë e mi!
Ky pushtet duhet rrëzuar sa më parë!I mbajtur në këmbë nga krimi i orgnizuar, i cili po mban peng dhe ka vënë nën thundrën e tij qyetete kryesore, pushteti i Edi Ramës, tashmë është rrezik kombëtar.Nëse ndër shqiptarë, ka ende njerëz që e duan vendin e tyre dhe kuptojnë rrezikun e këtij pushteti, duhet të ngrihemi dhe përmes fuqisë sonë të bashkimit, të shporrim bandën e grabitjes së shqiptarëve, dhe të rivendosim përmes vullnetit të lirë, pushtetin që i takon sovranit! Koha nuk pret! E pasnesërmja është larg! Demokracia, si pushtet i popullit, kërkon reagimin e popullit, ndaj le të kuptojmë rëndësinë e votës së lirë si premisën e duhur të pushtetit legjitim.
