Nga Indrit Vokshi
Patozi bëri një gabim. Agron Gjekmarkaj e shau në debat. I tha ordiner, mediokër, i pacipë etj. Nuk jam dakord me sjelljen e Gjekmarkajt, ta sqaroj – debati publik duhet të induktojë model dhe elitarizëm tek njerëzit, jo sharje.
Patozi tani, dy herë rresht i thotë: “Nuk merr vota as në Mamurras duke u sjellë kështu”.
Nuk e di çfarë e pandeh Astrit Patozi Mamurrasin që e identifikon me sharje dhe me atë sjellje. Mamurrasi në regjistër numëron rreth 23 mijë banorë. Smund ta steriotipizosh dhe ta identifikosh me 20 apo 30 rrugaçë, vetëm pse këta të fundit kanë qenë më të zhurmshëm se shumica.
Unë kam lindur në Mamurras, kam miq e kushërinj në Mamurras, kam dalë 22 herë në televizor, nuk kam sharë askënd dhe njerëzit kanë vlerësuar debatin me argumente. Nuk më ka refuzuar askush pse skam sharë, përkundrazi.
Prej 6 muajsh, demokratët e Mamurrasit, teksa flitej për kandidaturat e mundshme, kërkonin që PD të mos u caktonte kandidat rrugaç të hunit e litarit. Kjo rrëzon atë çfarë propagandon Patozi që gjoja ata vlerësojnë sharjet e dhunën.
Unë nuk e di pse i mëshojnë këtij steriotipit të Mamurrasit dhe duan ta paraqesin si Pikardia e antikitetit, ku pikët hidheshin nga pema, dilnin nga toka dhe sulmonin legjionet romake. Se nuk është se u shërben për ndonjë gjë, nuk u sjell ndonjë përfitim që të thuash “hajt se e ka të domosdoshme ta përdorë, ska rrugë tjetër.”
Për të qenë të sinqert ketë gabim e bëri Sali Berisha kur kërcënonte Nanon “Të rrëzoj me 40 vetë nga Mamurrasi”. Mamurrasi doli në skenën politike në kohëra krizash sepse ishte zonë e populluar me familje të eksterminuara nga komunizmi. Fitilin anti-socialist asokohe ja dha edhe vrasja e dy djemve në masakrën e Cerrikut në 1997 dhe ndodhi çfarë ndodhi. Politikën e Mamurrasit e ka përcaktuar vendimmarrja e Tiranës dhe ajo vendimmarrje i ka dhënë edhe fizionominë. Nuk është se u çua popullata dhe kërkoi me vullnet demokratik që të merrte atë fizionomi. (Temë tjetër sociologjiko-kulturore kjo).
Nuk e shkruaj ketë se po dua të shaj Patozin. Personalisht skam asgjë, nuk e kam takuar ndonjëherë. Partiakisht, sjam aq i pazgjuar sa ta shaj në emër të partisë, ngaqë 30 vitet pluralizëm na kanë mësuar se ata që shajnë x parti, kanë gjasa të pajtohen të bashkohen me lidershipin e asaj partie dhe të jenë më të çmuar se ti që qëndron korrekt dhe besnik ose më keq, bëhesh shkopi e kamikazi partiak. Po shave ti me pathos, je ti që del offside e ngjan si budalla, ndërkohë që ata të cilët shave, vijnë e pozicionohen në emër “të një bashkimi të madh vlerash e kontributesh.” Leksioni i historisë ky.
E kam shqetësimin tek steriotipizimi që i bëhet Mamurrasit. Skanë pse e steriotipizojnë një qytet apo një komunitet prej të cilit kanë dalë djem e vajza me talente të ndryshme, brenda të cilit jetojnë edhe shumë njerëz të cilët shohin punët e tyre, hallet e tyre dhe nuk çmojnë as sharjen në televizor as jashtë televizorit. Të jemi të qartë, nuk u shembet bota se steriotipizohet Mamurrasi. Thjesht skanë pse e bëjnë. Lërini në halle t’veta.
