Tërmeti i 26 nëntorit dhe tragjedia që shkaktoi në humbjen e 51 jetëve njerëzore, do të mbahet mend gjatë në memorien e shqiptarëve, të cilët e përjetuar në një panik dhe ankth të madh që u shoqërua me braktisjen masive të banesave të tyre.
I perceptuar në forma dhe mënyrë të ndryshme, ky tërmet gjen shprehje dhe në krijimet artistike, të cilat vijnë në kontekstin e ndjeshmërisë dhe të sensibilitetit njerëzor, duke sjellë në shijet e artdashësve ndjenjat dhe përjetimet emocionale të shoqërisë.
I konsideruar si piktor i ngjyrave të fortave dhe i mesazheve optimiste, Eduart Ndocaj, kësaj radhe sjell për artdashësit e pikturave të tij, një krijim që transmeton gjendjen psiko-emocionale që shkaktoi tërmeti i së martës së 26 nëntorit. Në pikturën e krijuar posacërisht, Ndocaj sjell imazhin femëror dhe lotin rrënqethës të saj, që rrëshket në faqet e rrëzituara nga hallet e shumta, duke përcjellë një trishtim dhe pikëllim të madh që goditi jetët tona dhe që ndërpreu hovin e përditshmërisë.
Në pikturën e tij, Eduart Ndocaj, të titulluar “Pikëllimi”, dëshmon qartazi se është një piktor i ndjesive të forta dhe i mesazheve jetësore, duke afirmuar veten si një piktor që artin e tij e përdor për mesazhe dhe sensibilizim jetësor dhe jo për komercializëm.
