“Final 4” i Kategorisë Superiore po i afrohet fundit të tij dramatik dhe emocionet kanë arritur kulmin.
Teksa pas mbylljes së ndeshjeve të javës së dytë kanë mbetur vetëm dy sfida për të përcaktuar skuadrën që do të shpallet kampione e këtij edicioni.
Gara për titull është më e hapur se kurrë më parë, me tre skuadra që ende mbajnë gjallë shpresat matematikore Egnatia, Elbasani dhe Vllaznia, ndërsa gjithçka do të vendoset në 180 minutat e fundit të sezonit. Situata në krye të renditjes është tejet e ngjeshur.
SKENARËT E TITULLIT
Në këtë fazë të garës, matematika është bërë po aq e rëndësishme sa edhe fusha e lojës. Çdo kombinim rezultatesh sjell një histori të ndryshme dhe tensioni është maksimal.
EGNATIA SHPALLET KAMPIONE NËSE:
- Arrin të fitojë ndaj Dinamos, duke mos i lënë asnjë shans rivalëve të afrohen.
- Barazon ndaj Dinamos dhe Elbasani nuk arrin të marrë fitore ndaj Vllaznisë. Në këtë skenar, rrogozhinasit do të përfitonin nga avantazhi në renditje dhe nga rezultatet direkte, duke ruajtur pozicionin e tyre në majë.
ELBASANI SHPALLET KAMPION NËSE:
- Fiton ndaj Vllaznisë dhe njëkohësisht Egnatia nuk arrin të marrë tre pikë ndaj Dinamos.
- Barazon me Vllaznia dhe Egnatia pëson humbje ndaj Dinamos.
VLLAZNIA SHPALLET KAMPIONE NËSE:
- Fiton ndaj Elbasanit dhe Dinamos arrin të mposhtë Egnatian Ky është skenari më i vështirë dhe më i varur nga kombinimet e rezultateve të tjera, por matematika ende nuk e ka përjashtuar plotësisht skuadrën shkodrane.
