Ish-Kryetarja e Kuvendit dhe ish-ministrja e Jashtme, Elisa Spiropali, ka rikthyer në vëmendje një nga statuset e saj më emocionale kushtuar Shkodrës, një tekst i gjatë me tone poetike dhe identitare, që shumë ndjekës po e interpretojnë jo vetëm si nostalgji personale, por edhe si një lëvizje politike me prapavijë të qartë.
Publikimi i titulluar “Zoja Shkodër asht’ Dashni”, i shkruar fillimisht në maj të vitit 2023, është ripostuar në një moment kur debatet brenda kampit socialist për raportin me qytetet veriore dhe elektoratin tradicional kanë marrë sërish vëmendje.
Në tekst, Spiropali idealizon Shkodrën si simbol qytetarie, kulture, ironie ndaj diktaturës dhe krenarie identitare, duke përdorur një gjuhë të ngrohtë dhe të afërt me publikun verior. Por përtej romantizmit letrar, statusi është lexuar edhe si një sinjal politik për të mbajtur kontakte emocionale me bazën socialiste në Shkodër dhe më gjerë në Veri.
Analistë të komunikimit politik e shohin këtë dalje si një kundërreagim të tërthortë ndaj disa deklaratave të fundit të kryeministrit Edi Rama, të cilat janë komentuar në rrjet si ironike apo kritike ndaj mënyrës sesi perceptohen disa qytete dhe komunitete tradicionale.
Në vend të një replike direkte politike, Spiropali ka zgjedhur simbolikën emocionale dhe identitare, duke përdorur Shkodrën si metaforë të qytetarisë dhe rezistencës kulturore. Një strategji që në politikë shpesh shërben për të ruajtur ekuilibrat brenda mazhorancës, pa krijuar përplasje të hapur publike.
Statusi ka marrë reagime të shumta në rrjetet sociale, sidomos nga qytetarë shkodranë, të cilët e kanë vlerësuar gjuhën autentike dhe vlerësimin për identitetin e qytetit.
postimi i plotë
Zoja Shkodër asht’ Dashni
Zoja Shkodër asht’ Dashni për disa arsye.
Zoja Shkodër asht’ Dashni sepse qytetet dallohen dhe mburren, për shembull, ngaqë njëri ka pranë një kështjellë të famshme, tjetri lumë që vjen nga larg duke u spërdredhur mes maleve, tjetri urë të famshme, tjetri mal të lartë, tjetri liqen të magjishëm, tjetri det, e kështu me radhë.
Zoja Shkodër asht’ Dashni sepse është i vetmi qytet në botë që nuk ka 1, por krejt mrekullitë e botës.
Zoja Shkodër asht’ Dashni sepse Zoja Shkodër ka kala hijerëndë me legjendën më drithëruese dhe më të bukur në botë. Jo e bukur vetëm për me habit vizitorët me legjenda. E bukur sepse ka bërë efektivisht luftëra nga më të tmerrshmet.
Zoja Shkodër asht’ Dashni sepse Zoja Shkodër ka det.
Zoja Shkodër asht’ Dashni sepse Zoja Shkodër nuk ka 1 por 3 lumenj, Drinin, Kirin, Bunën.
Zoja Shkodër asht’ Dashni sepse Zoja Shkodër ka Urën e Mesit që është urë nga më mahnitëset në botë.
Zoja Shkodër asht’ Dashni sepse Zoja Shkodër nuk ka 1 mal, por mu në oborr të Saj, krejt Alpet e egra dhe madhështore.
Zoja Shkodër asht’ Dashni sepse Zoja Shkodër ka Kisha dhe Xhami me histori jashtëzakonisht interesante.
E të tjera, e të tjera.
Por Zoja Shkodër asht’ Dashni edhe sepse ka;
Qytetari’ me ia pasë zili,
Histori frymëndalëse,
Natyrë, ngjyra, aroma, marramendëse.
Klimë të pakonkurrueshme,
Zoja Shkodër asht’ Dashni sepse Zoja Shkodër dhe Zojat e Zotnit shkodranë nuk ngjajnë me askënd në botë, veçse me veten e vet.
Zoja Shkodër asht’ Dashni sepse diktaturën, në mënyrën më inteligjente, më therëse, më ironike, më bukur dhe më hidhur prej krejt nahive të tjera të Shqipërisë, e ka tallë, e ka përqeshë, Zoja Shkodër, Zojat dhe Zotnitë shkodranë.
Zoja Shkodër asht’ Dashni sepse barcaletat më të rrezikshme, më me spec kundër diktaturës, ato që përmes humorit evidentonin anët më të errëta dhe më kriminale të diktaturës, para se me ardh në Tiranë, janë shpik në Shkodër.
Zoja Shkodër asht’ Dashni sepse zërat më të bukur, tingujt më të fuqishëm, këngët më melodioze të vjetra dhe të reja, e kanë shtëpinë, ku tjetër veçse te Zoja Shkodër?!
Zoja Shkodër asht’ Dashni sepse në krejt botën, natën poshtë dritares apo dikund tjetër, për me lyp Dashuri i këndohen serenata të dashurës, e shumta të fejuarës. E Zoja Shkodër asht’ Dashni edhe sepse Zoja Shkodër asht i vetmi qytet në botë, aq i butë e aq i bukur, aq plot me dashuri, ku serenata i këndohet edhe Nuses. Kënga e mrekullueshme “Serenatë Nuses” asht’ prova.
Zoja Shkodër asht’ Dashni sepse Zoja Shkodër dhe Zojat e Zotnit e Zojës Shkodër e bëjnë dallimin mes mashtruesit dhe të sinqertit, seriozit dhe qesharakut, punëtorit dhe parazitit.
Zoja Shkodër asht’ Dashni sepse Zoja Shkodër nuk është tamam-tamam qytet.
Shumë më tepër se qytet, Zoja Shkodër asht’ muzë frymëzuese për gjithkënd që i afrohet, e kupton, e ndjen.
Zoja Shkodër asht’ Dashni sepse Zoja Shkodër, tu e dit’ sa fort e du, ma fal që nuk ia imitova si duhet Dialektin.
16 MAJ, 2023
