Vangjel Tavos i është dhënë nga kryeministri Rama drita jeshile të marrë fonde pa fund dhe të bëjë tendera si i do qejfi. Ky është çmimi i fitores së zgjedhjeve për kryetar bashkie të Himarës, në favor të Partisë Socialiste.
Fondi i ndarë për këtë qëllim është plot 1.62 miliardë lekë dhe siç del nga zhvillimi i tenderit, është paracaktuar për një kompani nga Finiqi, me pronar biznesmenin Dashnor Lazaj.
Për mikun e tij Tavo nuk pyet për ligjin. “Skualifikim i të gjithë operatorëve konkurrues perveç fituesit/ Skualifikim i ofertës me vlerë më të ulët”, kështu e ka klasifikuar Open Data Albania procedurën e prokurimit. Për shkeljet e konstatuara, te nderi është shënuar me “Flamur të kuq që është shenja e riskut të korrupsionit.
Objekti i tenderit është përmirësimi i ndriçimit me llampa led i rrjetit rrugor me fondin limit 162 500 000,00 lekë pa TVSH.
Në datën e mbajtjes së tenderit më 5 maj 2025, numri i operatorëve pjesëmarrës ishte vetëm dy. Mungonte interesimi sepse kohët e fundit në këtë bashki dihet qysh më parë se cila kompani e fiton tenderin.
Konkretisht, përballë kompanisë “A.91” SHPK me pronar Dashnor Lazajn u prezantua bashkimi i operatorëve “HTM” shpk & “BE-IS” sh.p.k. Por ky i dyti do të shërbente thjesht si numër sepse komisioni do ta skualifikonte qysh në fillim.
Prandaj propozimi i firmës së Lazajt me vlerën 145 350 531,00 Lekë pa TVSH u kthyer në ofertë fituese, që u shpall zyrtarisht më 9 qershor 2025.
Oferta e bashkimit të operatorëve të skualifikuar për këtë punë ishte 141,676,342 lekë pa TVSH. Nëse do të ishte marrë në konsideratë ky propozim, arkës së bashkisë Himarë do t’i kurseheshin të paktën 44 milionë lekë.
Nga ana tjetër është e dyshimtë, nëse operatori fitues i ka kualifikimet e duhura teknike për të realizuar këtë kontratë. Nga një verifikim që bëmë sot në QKB, rezulton se kompania “A. 91” shpk nuk ka ndonjë licence aktive.
Si do t’i kryejë punimet kjo kompani kur nuk ka licencë vlefshme nga Ministria e Infrastrukturës dhe Energjisë?
Por, siç e cekëm më sipër, Vangjel Tavo për miqtë e thyen shpesh ligjin. Kujtojmë se në nëntor 2024, Vangjel Tavo u thirr në SPAK ku u mor në pyetje në lidhje me një kallëzim që është bërë në kohën kur ishte prefekt i Vlorës.
