Policia e Durrësit ka finalizuar me sukses operacionin policor të koduar “The Wrong Meeting”, duke goditur një rrjet kriminal të përfshirë në prodhimin dhe shpërndarjen e lëndëve narkotike, si dhe në armëmbajtje pa leje.
Operacioni u zhvillua nga Specialistët e Seksionit për Hetimin e Narkotikëve, në bashkëpunim me Forcën e Posaçme Operacionale të DVP Durrës, pas një hetimi të gjatë dhe përdorimit të metodave speciale të ndjekjes.
Në përfundim të operacionit, në zonën e Golemit, u arrestuan në flagrancë dy persona: Shaban Tusha dhe Dario Sefa, të cilët u kapën gjatë një shkëmbimi prej 4.5 kg kanabis. Gjatë hetimeve u zbulua se pjesë e aktivitetit ishte edhe një 17-vjeçar me inicialet J. B., në banesën e të cilit policia gjeti 1.1 kg kanabis.
Gjatë kontrollit në banesën e Shaban Tushës në Vorë, policia sekuestroi edhe 600 gram kanabis, një armë zjarri, municion luftarak, jelekë antiplumb dhe pajisje që shërbenin për kultivimin e bimëve narkotike.
Policia po vijon punën për të kapur dy persona të tjerë që janë shpallur në kërkim, si dhe për të identifikuar të gjithë pjesëtarët e rrjetit kriminal.
Materialet e mbledhura janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme ligjore.
