Presidenti amerikan Donald Trump nuk e ka përjashtuar mundësinë e një lufte kundër Venezuelës, në një kohë kur Uashingtoni po rrit presionin ndaj Karakasit, duke vendosur edhe një bllokadë detare.
“Jo, nuk e përjashtoj,” deklaroi presidenti republikan në një intervistë telefonike për rrjetin televiziv NBC News, e regjistruar të enjten dhe transmetuar sot.
Trump akuzon presidentin e Venezuelës, Nicolás Maduro, i konsideruar si një nga “armiqtë” e SHBA-së, se është në krye të një rrjeti trafiku droge, akuza që Maduro i ka mohuar kategorikisht.
“Nicolás Maduro e di saktësisht se çfarë dua. Ai e di më mirë se kushdo tjetër,” tha Trump, duke refuzuar megjithatë të sqarojë nëse qëllimi i tij është rrëzimi i presidentit venezuelian.
Në fillim të javës, Trump njoftoi për një “bllokadë të plotë” ndaj anijeve cisternë që i janë nënshtruar sanksioneve dhe që afrohen ose largohen nga Venezuela.
Në intervistë ai paralajmëroi se do të ketë konfiskime të tjera të anijeve, pas sekuestrimit javën e kaluar të një cisterne që transportonte naftë venezueliane.
