ERËS…
Dua t’i them erës: më merr e tutje më ço,
Atje ku bota s’ka lot e dhimbje,
Ku lufta e shkatërrimi nuk ekzistojnë,
Ku fjala “dashuri” është perëndi!
Erë, të lutem, më ço atje përtej,
Në krahët e fatit mos më lër,
S’do të di ku të shkoj, e humbja do të bëhet sinonimi im.
I lutem erës: dashurinë ma trego,
Më trego ku fshihet, dhe nga gjumi ta zgjoj…
T’i them se bota ka nevojë për të…
Të lutem, erë, ajër, qiell, univers…
A kushdo qofsh, më merr me vete,
Rreth e qark botës të shkoj,
Të shoh e të prek çdo gjë mbi dhe,
Dhe bashkë me erën të kthehem…
Të kthehem atje ku më mori dje!
XHESI GAVELLI
Biografi!
Xhesi Gavelli ka lindur në Berat.
Xhesi Gavelli nisi studimet për violinë që në klasën e parë, pranë qytetit të saj të lindjes. Më pas, ajo vazhdoi arsimin 9-vjeçar dhe të mesëm në Shkollën Kombëtare të Arteve “Jordan Misja”, në degën e violës.
Studimet e larta i përfundoi në Universitetin e Arteve, Tiranë, në degën Violë dhe Mësuesi. Gjatë karrierës së saj artistike, ka marrë pjesë në një sërë aktivitetesh brenda dhe jashtë vendit, duke u vlerësuar me disa çmime të para në konkurse kombëtare dhe ndërkombëtare.
Aktualisht, ajo punon si mësuese në degën e Violës pranë Liceut Artistik “Jordan Misja” në Tiranë.
