Në qytetin e Tetovës, në Maqedoninë e Veriut, u zhvillua edicioni i 29-të i Festivalit Ndërkombëtar të Poezisë “Ditët e Naimit”, një ngjarje që prej afro tri dekadash është bërë emblemë e kulturës poetike në hapësirën shqiptare dhe më gjerë. Ky festival, që mban emrin e rilindësit të madh Naim Frashëri, shërben si urë lidhëse mes poetëve të vendeve dhe kulturave të ndryshme, duke promovuar dialogun artistik dhe gjuhësor përmes vargjeve.
Në këtë edicion morën pjesë poetë nga tri kontinente, të cilët performuan krijimet e tyre përballë një publiku të etur për poezi, në një atmosferë të ngrohtë dhe frymëzuese. Pjesë e këtij festivali ishte edhe poeti Albi Lushi, i cili u nderua me çmimin prestigjioz “Qiriu i Naimit”, një simbol i veçantë i festivalit që jepet për poezinë më të mirë të edicionit.
Në një reagim për pjesëmarrjen dhe vlerësimin e marrë, poeti Lushi u shpreh i nderuar që ishte pjesë e një aktiviteti me peshë të tillë kulturore, dhe falënderoi organizatorët, veçanërisht profesor Shaip Emerllahun, drejtorin e festivalit për ftesën dhe mikpritjen.
“Jam shumë mirënjohës jurisë që më nderoi me çmimin prestigjioz, simbol të festivalit, ‘Qiriu i Naimit’ për poezinë më të mirë në këtë aktivitet, të cilin ia bashkëngjita shumë të tjerëve të këtij rangu që nderojnë Shqipërinë, kulturën, historinë dhe gjuhën e bukur shqipe,” – u shpreh Lushi.
Përveç suksesit personal, ai theksoi rëndësinë e përvojës së ndarë me poetë të tjerë ndërkombëtarë, ku bashkëbisedimet dhe shkëmbimet krijuese krijuan ura të reja njohjeje dhe frymëzimi.
Festivali “Ditët e Naimit” mbetet një arenë e rëndësishme për afirmimin e poezisë si gjuhë universale e shpirtit dhe mendimit, duke mbajtur të gjallë vlerat e letërsisë shqipe në një kontekst global.
