Kryeministri izraelit Benjamin Netanyahu ka kritikuar ashpër Presidentin francez Emmanuel Macron, duke e akuzuar se po nxit antisemitizmin në Francë përmes planeve për njohjen ndërkombëtare të shtetit të Palestinës.
Në një letër zyrtare të datës 17 gusht, Netanyahu i kërkon Macron-it të “zëvendësojë dobësinë me veprim dhe qetësimin me vullnet”, duke i bërë thirrje që të tërhiqet nga vendimi për njohjen e Palestinës.
“Jam i shqetësuar për rritjen alarmante të antisemitizmit në Francë dhe mungesën e veprimeve vendimtare nga qeveria juaj për ta luftuar atë,”- shkruan Netanyahu në letrën e tij.
Ai lidh rritjen e incidenteve antisemite në Francë me qëndrimet politike të Macron kundër Izraelit dhe njoftimin për njohjen e shtetit palestinez.
Netanyahu e cilëson këtë vendim si një “shpërblim për terrorin e Hamasit”, duke shtuar se ai inkurajon urrejtjen dhe kërcënimet ndaj komunitetit hebre në Francë. Letra liston disa incidente të fundit në Francë, si plaçkitja e zyrave të linjës ajrore izraelite El Al në Paris, sulmet ndaj rabinëve dhe një qytetari hebre në Livry-Gargan.
“Këto incidente nuk janë të izoluara. Ato janë një plagë,”- theksoi Netanyahu, duke paralajmëruar se qetësia e udhëheqësve përballë urrejtjes vetëm sa e përkeqëson situatën.
Kryeministri izraelit vlerësoi gjithashtu Presidentin amerikan Donald Trump për “luftën e tij kundër krimeve antisemite” dhe për “mbrojtjen e hebrenjve amerikanë”.
“Antisemitizmi është një kancer. Ai shumëfishohet kur udhëheqësit heshtin. Ai tërhiqet kur ata veprojnë,”- përfundon letra e Netanyahut.
Në fund të majit, Presidenti Macron deklaroi se Franca planifikon të njohë shtetin e Palestinës në muajin shtator, në kuadër të Asamblesë së 80-të të Përgjithshme të Kombeve të Bashkuara në Nju Jork. Vendimi është pritur me kritika të forta nga Tel Avivi, ndërsa Parisi ka argumentuar se ai synon të kontribuojë në një zgjidhje të qëndrueshme me dy shtete në Lindjen e Mesme.
