Deri në muajin Mars llogaritet se minimalisht 143 mijë shqiptarë do të duhet të plotësojnë deklaratën vjetore të të ardhurave, që njihet me ermin DIVA.
Këtë detyrim e ka çdo individ që ka një pagë bruto 1000 euro si dhe të dypunësuarit pavarësisht të ardhurave vjetore që gjenerojnë.
Alekta Çabej nga administrata tatimore gjatë një interviste në Vizion Plus thotë se kjo deklaratë është ndër më të rëndësishmet për individin.
“Njësoj si biznesi që bën një bilanc, ashtu edhe individi do të duhet të bëjë një bilanç të të ardhurave të tij. Duhet ti deklarojë tek formulari që njihet me ermin DIVA, që gjëndet në faqen e tatimeve, pasi të jetë rregjistruar. Kujdes afati i fundit është data 31 Mars”, sqaroi Çabej në emisioni E-ZONE
Por përveç pagës, çfarë të ardhure tjetër do të duhet të deklarojnë shqiptarët?
“Do të duhet të deklarojnë të ardhurat që përfitojnë nga një depozitë bankare, interesat e tyre, apo nga investimi në bono thesari, duhet të deklarojnë edhe kontratat e shërbimit që kanë në fuqi edhe për shërbime i ofrojnë jashtë vendit. Subjekt i deklarimit janë të ardhurat që gjenerohen brenda dhe jashtë kufirit. Duhet të deklarojnë çdo të ardhur nga shitja e një pasurie apo nga dhënia me qira e një të tille, siç janë apartamentet në platformat one line si Booking dhe AirBNB“, sqaroi Çabej
Kjo proçedurë e re që prek minimalisht 143 mijë shqiptar është një detyrim që rrjedh nga ligji për tatimin mbi të ardhurat. Një vit më parë këtë detyrim e kishin vetëm ata që kishin të ardhura vjetore 2 milion lekë. Këtë vit kufiri është ulur në 1.2 milion lekë bruto.
Nëse nuk e plotësoni deklaratën penaliteti nis me 3 mijë lekë dhe më pas aplikohen kamatëvonesa. 143 mijë është numri i individëve që kanë të ardhura 1.2 milion lekë vetëm nga paga. Pritshëmritë janë që kjo shifër të jetë edhe më e lartë, pasi shumë individë kanë të ardhura të tjera shtesë.
