Zv/kryeministres, njëkohësisht ministres së Infrastrukturës dhe Energjisë, Belinda Balluku po i bëhen “mal” kallëzimet në Prokuroria e Posaçme (SPAK). Jo vetëm kaq, por Balluku është zyrtarja e lartë që ka numrin më të madhe të drejtorëve në hetim nga Prokuroria e Posaçme apo janë të arrestuar për korrupsion dhe abuzim në tendera. Lidhur me këto zhvillime, gazetari Almer Toska ka paralajmëruar se Balluku shumë shpejt do të arrestohet nga SPAK. Në një studio televizive, Toska tha Belinda Balluku ka dhënë 5 miliardë euro koncesione dhe se nga hetimet e SPAK është zbërthyer telefoni i Sekretares së Përgjithshme të saj, Viola Haxhiademit.
“Thuhet se është zbërthyer telefoni i Sekretares së Përgjithshme të saj, Viola Haxhiademi, janë gjetur perla, menyra se si janë shpërndarë paratë”, tha Toksa, ndërsa shtoi se Ceno Klosi, Belinda Balluku dhe Viola Haxhiademi, do të arrestohen shumë shpejt. “Çështja e Belinda Ballukut është një nga më të rëndësishmet. Janë dhënë 5 miliardë euro konçensione. Thuhet se është zbërthyer telefoni i Sekretares së Përgjithshme të saj, Viola Haxhiademi, janë gjetur perla aty, se si janë shpërndarë paratë. Tani kjo është një çështje që Dumani duhet të na tregojë nëse është i Edi Ramës apo i amerikanëve. Ceno Klosi, Belinda Balluku dhe Viola Haxhiademi, do të arrestohen shumë shpejt”, tha Toska, referuar burimeve të tij.
Mësohet se prokurorët specialë i kanë kopsitur disa dosjedhe po bëjnë gati goditje të forta në ministritë e Ballukut, sidomos te Drejtoria e Rrugëve, KESH, FSHZH, Albpetrol, Portet Detare, koncesionet e HEC-ve, Transporti Rrugor, Hekurudhë, Albcontrol, Agjencia e Burimeve Minerare dhe lejet e resorteve. Tashmë SPAK po afrohet edhe më shumë te “koka” që lëviz fijet korruptive. Nuk mund të ketë dhjetëra abuzues në ministrinë që drejtohet nga Balluku dhe ministrja i ka lënë të lirë të hanë “dardha pas shpine”. Faktet po plotësohen një nga një dhe nuk përjashtohet që ajo të pësojë fatin e Arben Ahmetajt.
Shtohen akuzat
Gjithashtu Balluku është akuzuar ditën e djeshme edhe nga kreu i PD Sali Berisha. Gjatë takimit që zhvilloi me grupin e punës të Qarkut të Lezhës, në selinë blu, Berisha tha se Balluku ndan rrugët në “lote” për të vjedhur sa më shumë. “Secili prej tyre është më i kalbur se shoku. Merr ti se ç’bën kjo e rrugëve, po kjo është e pashoqe. Nga mëngjesi deri në darke flet loti, loti, loti. Dhe tani do ta quajmë do ta quajmë Lubi Loti, i kam thënë Lubi Balluk dhe tani do t’i them Lubi Loti.
Çarë janë ato? Ato janë copëzime të rrugës për të vjedhur më shumë. Nuk ndahen, po si mor mund ta ndash ti rrugën 12, 13 km në 14 kontrata, apo rrugën Elbasan Librazhd, kush e merr vesh sa? Kanë sjellë modelin e vjedhjeve në bashki që kishte ky me leje të ndërtimit dhe ai është bërë model universal. Por ne nuk fitojmë për këto arsye, ne fitojmë se kemi programin tonë, kemi premtimet tona të cilat në mënyrë absolute e përmbysin këtë situatë”, u shpreh Berisha.
Denoncimet për Ballukun
Kujtojmë se ditët e fundit dosjet në SPAK po shtohen për Ballukun. Ajo akuzohet se ka miratuar kosto 3 herë më të larta për impiantin fotovoltaik në digën e Zadejës. Sipas PD, që çoi kallëzimin në SPAK, Balluku firmosi për një kosto 8 milionë për impiantin fotovoltaik në digën e Zadejës ndërkohë që nga privati kushtonte 3 mln euro. Po ashtu një dosje tjetër është çuar në tavolinën e SPAK, sërish nga Partia Demokratike për Ballukun, ku e akuzon se vetëm për 1 vit ka abuzimi me shit-blerjen e energjisë elektrike ka shkuar në mbi 180 milion euro.
Në një konferencë për mediat ku denoncoi skandalin, kreu i grupit parlamentar të PD-së, Gazment Bardhi deklaroi se Balluku, me veprimet dhe mosveprimet e saj, ka lejuar që energjia elektrike të shitet me humbje jashtë tregut të Bursës, në kundërshtim me ligjin dhe vendimet në fuqi, duke vjedhur hapur qytetarët shqiptarë dhe duke favorizuar 4-5 kompani pranë saj.
