Një grup punonjësish të shkarkuar nga bashkia protestuan këtë të martë para institucionit duke mos qenë dakord me këtë vendim. Ata thonë se kanë shumë vite të punësuar dhe se ky shkarkim është i padrejtë.
Ndërkohë, kryetari i bashkisë Shkodër Benet Beci bëri një reagim lidhur me çështjen dy ditë më parë, duke u shprehur se shkarkimet vijojnë pasi janë konstatuar “pozicione të dubluara dhe specialistë që vetëm kishin emrin në borderotë e rrogave, por nuk ofronin asnjë shërbim për banorët e Shkodrës”.
Një reagim lidhur me këto shkarkime bëri edhe ish kryetari i bashkisë Shkodër Bardh Spahia i cili tha se “të paktën 180 kryefamiljarë, gra dhe burra janë hedhur në rrugë me vendim të kryebashkiakut të paligjshëm, të emëruar nga krimi i organizuar, Benet Beci”.
“Me skenarin në përsëritje të Rilindjes 2013 për gjoja ristrukturim, po ndodh spastrim politik. Asgjë për t’u habitur nga një kryebashkiak që urdhrat i merr nga një kryeministër dhe nga një bandë që kanë frikë nga njerëzit e lirë dhe të ndershëm”, shtoi ai.
