Kryetari i PD, Sali Berisha tha në konferencën për shtyp se nën hetim në SHBA nuk është vetëm kryeministri Edi Rama, por e gjithë qeveria e tij. Berisha tha se, disa ministra kanë paraqitur dorëheqjen. Berisha tha po ashtu se ‘në tavë’ është edhe kryebashkiaku i Tiranës, Erion Veliaj.
“Di që ka ministra që kanë paraqitur dorëheqjen për shkak të kontakteve që ata kanë pasur me McGonigal.
Por nëse bëhet fjalë për zëdhënës të interesave ruse në Shqipëri, ky është Damian Gjiknuri. Pra, jemi në fillimin e një tërmeti dhe i them Edi Ramës se ky do jetë një cunam popullor.
Erion Veliaj kreu një udhëtim të fshehtë. Është në tavë. Shkoi për të dëshmuar, apo për një arsye tjetër, atë ta sqarojë hetimi, por ky pushtet është i kalbur dhe duhet të ikë një ditë e më parë,” tha Berisha.
I pyetur nëse ishte në dijeni të faktit që disa prej ministrave kanë dhënë dorëheqjen dhe cilët janë emrat e ministrave, Berisha tha: “Unë disponoj dokumente autentike për atë që thashë, por do t’i bëj publike në momentin real, disponoj dokumente të pakundërshtueshme”.
Kryetari i Partisë Demokratike, Sali Berisha ka zbuluar detaje nga takimi me kreun e Partisë së Lirisë, Ilir Meta, ku mes të tjerash kanë folur edhe për aksionin opozitar. Por i pyetur nga gazetarët nëse do të ketë protesta të enjten para parlamentit, Berisha tha këtë përgjigje:
“Sigurisht që diskutuam për gjendjen kritike në vend dhe mënyrën e përballimit të kësaj situatë tepër kritike. Diskutuam gjerësisht dhe gjetëm pajtim të plotë në mendime për qëndrimet që duhet të mbajmë. Parlamenti ‘Linda Rama’ ka humbur çdo legjitimitet me aktet që bën”.
Berisha u pyet edhe për pjesëmarrjen në zgjedhje, në kushtet kur gjykata njeh PD e Alibeajt, por ai tha se gjykata e ka dhënë fjalën e saj më 25 mars.
