Ashtu siç ishte paralajmëruar, qeveria ka njoftuar këtë të Enjte rritjen e çmimit të energjisë elektrike për ata abonentë familjarë që konsumojnë më shumë se 800 kWh në muaj, duke filluar nga Tetori.
Në një komunikim për mediat këtë të të Enjte, ku u prezantua një paketë e dytë ndihmëse që pas rritjes së çmimeve, kryeministri Edi Rama njoftoi masën e re me qëllim “kursimin e energjisë”.
Zëvendëskryeministrja Belinda Balluku tha se 96 përqind e familjeve në vend konsumojnë më pak se 800 kWh në muaj.
Për familjet që konsumojnë mbi këtë fashë, u tha se do të paguhet nga abonentët me “çmimin e tregut”. Balluku saktësoi se kjo kategori do ta paguajë 1 kWh me 42 Lekë, nga 9 Lekë që paguan aktualisht.
Masa, shtoi ministrja e Energjetikës, do të rishikohet në fund të vitit.
Kryeministri Edi Rama deklaroi se me këtë nismë “synojmë të krijojmë një presion për të ulur konsumin e tepërt të energjisë elektrike në kushte krizë”.
“Nisur nga analiza e të gjithë fashave të konsumatorëve. Mbi 90 % konsumatorë familjarë konsumojnë rregullisht më pak se 800 kW/h. 6-7 % e totalit konsumojnë më shumë se 800 kW/h. Bëhet fjalë për familjarë me vila, pishina, oborre të gjera, për të cilët ka ardhur koha nuk mund të paguajë më buxheti I shtetit. Çdo kilovat mbi 800 do të paguhet me çmimin e tregut”, tha Rama.
“Sot lexova që Zvicra ka vendosur penalitetin e 3 viteve burg për ata që ngrohin më shumë se 19 gradë shtëpinë e tyre. Në Gjermani është paraqitur plani për fikjen e dritave në të gjitha bizneset pas orës 10 të darkës. Ne nuk kemi plan të tillë shkurtimesh drastike a detyrimesh të kësaj natyre apo penalitetesh, por kjo nuk do të thotë që Shqipëria nuk ka nevojë”, shtoi ai.
Belinda Balluku tha se do ngrihet “task forca” që do ketë si synim uljen e humbjeve në rrjet, kontrollin e gjithë faturave dhe matjeve, monitorimi i punonjësve të OSHEE dhe masat e eficencës së energjisë.
Ajo shtoi se Qeveria do subvencionojë abonentët që aplikojnë për instalimin e paneleve diellore në tarracat e pallateve.
“Ky projekt do nisë me 2000 abonentë dhe për ta do ketë një grant mbështetje 70% të kostos për vendosjen e paneleve diellore. Projekti do nisë në 1 tetor, por nga data 1 nëntor e këtij viti abonentët do kenë mundësi të aplikojnë për të marrë këtë grant për instalimin e paneleve diellore”, deklaroi ajo.
Ministrja bëri me dije se masa për kursimin e energjisë do ndërmerret dhe në institucionet shtetërore, ku sipas saj, do caktohet një person për çdo ent, qe do quhet administratori i energjisë. Detyra e tij do jetë të garantojë një ulje me 15 % të konsumimit që është trageti që duhet arritur.
