Nga Marsela Lekli, psikologe
Rasti i bërë publik sot, ku një e mitur 11 vjeçare bie pre e shtazërisë së 5 meshkujve në Prishtinë, është vijimësi e panoramës së degradimit total të shoqërisë shqiptare në të gjitha trojet e saj.
Femra shqiptare, me gjithë vuajtjet e saj ndër shekuj, ku përtej rolit mëmësor, i është dashur të marrë pjesë fizikisht në të gjitha punët e rënda, si dhe të vuajë peshën e dogmave kanunore dhe të kodifikimeve të ndryshme, sot përballet me trajtimin përçmues të saj nga qënie të neveritshme që ndotin mjedisin njerëzor.
Të gjithë bashkë duhet të reagojmë, pasi kjo është çështje që i përket tërë shoqërisë, institucionet të krijojnë sa më parë mekanizmat veprues, ligji të veprojë me rreptësinë më të madhe! Një shoqëri e vlerave të saj, ndërtohet mbi themelet e respektimit të dinjitetit njerëzor dhe në mënyrë të veçantë e respektit ndaj femrës.
Çdo tolerim i sotëm, çdo vonesë e implementimit të drejtësisë mbi abuzuesit është premisë ndjellakeqe e tatëpjetës së pandalshme, deri në zhbërje totale të vlerave morale të shoqërisë sonë.
