Nga Mirela Karabina
Partia Demokratike ka një mision!
Prej muajsh vendi ka rënë në një kolaps politik të pandodhur më parë. Nga njëra anë pushteti që drejton nëpërmjet krimit dhe korrupsionit galopant dhe, nga ana tjetër një opozitë e copëzuar e cila nuk shërben.
Vendimi i Departamentit të Shtetit për shpalljen non-grata të Z. Berisha, pa diskutim ishte goditje e rëndë për Partinë Demokratike, dhe jo vetëm. Goditja e dytë nga Mbretëria e Bashkuar e thellon më tepër këtë situatë, duke e dobësuar edhe më tej këtë forcë politike. Demokratët nuk do ta dëshironin këtë situatë.
Për 46 vjet nën regjimin komunist, shqiptarët vuajtën pasojat fatale të mbylljes dhe izolimit nga “armiku i jashtëm” anglo-amerikan. Sot, më 2022-in, ky është mision i pamundur, aq më tepër tani që rruga drejt integrimit në Bashkimin Evropian, mendërisht dhe institucionalisht, sapo është hapur.
Lufta e Z.Berisha për dinjitet personal dhe për të qartësuar pozicionin e tij kundrejt aleatëve dhe partnerëve, është një luftë plotësisht e drejtë që shqiptarët e mbështesin. Urojmë që në këtë përballje Ai të dale, ashtu sikurse dhe e pohon vetë, i pafajshëm.
Por, në këtë situatë kritike për Partinë Demokratike dhe për Shqipërinë, mençuria e liderve bën ndryshimin. Nje hap pas, lënia e partisë në rrugëtimin e saj krah aleatëve dhe partnerëve për të fuqizuar marrëdhëniet transatlantike dhe për të ndërtuar shtetin ligjor dhe të së drejtës përmes institucioneve demokratike.
Partia Demokratike është parti e shqiptarëve, është partia më e madhe opozitare dhe misioni i saj është të ndalë këtë keq qeverisje duke ofruar një model ndryshe që t’i shërbejë të vendit.
Ndaj për çdo demokrat, një parti që lufton me dinjitet në emër të lirisë dhe demokracisë duhet të jetë qëllimi i përpjekjeve të tij.
E izoluar dhe e vetme, ajo nuk mund ta përmbushë këtë mision.
22 Korrik 2022.
