Deputeti i PD, Kreshnik Çollaku ka ftuar të gjithë kolegët e mazhorancës që të bashkohen për të plotësuar standardet në mënyrë që të jetë më i shpejtë anëtarësimi i plotë në BE.
Në një intervistë për Report Tv, në emisionin ‘Repolitix’ të gazetarit Denis Minga, Collaku tha se është e rëndësishme që të mos festohet në këtë moment por që detyra e cdo politikani të jetë integrimi i Shqipërisë në BE.
“Kjo ditë të shërbejë si reflektim i thellë dhe do ftoja kolegët e mazhorancën të ndalim shampanjën e festën, e dimë historinë e vonesave, sot duhet të ulemi e të kuptojmë që çdo ditë që Shqipëria vonon drejt plotësimit të standardit të vendit, drejt anëtarësimit të plotë në BE, rrezikohet jo vetëm mirëqenia por edhe rreziqe të natyrës së sigurisë. Ne nuk mund të presim një sulm tjetër siç ndodhi ky në Ukrainë.
Situata të tilla ndodhin dhe mënyra më e mirë që të jemi të mbrojtur është integrimi i plotë i Shqipërisë. Detyra jetike e çdo politikani është të shndërrojnë integrimin në BE si prioritet dhe duhet të kalojmë çdo dallim të brendshëm. Hapja e negociatave nuk është festa, procesi është sfidues dhe ne nuk duhet të humbim asnjë sekond. Çdo gabim mund t’i kushtojë shtrenjtë Shqipërisë”, tha Çollaku.
Shqipëria dhe Maqedonia e Veriut çelën sot negociatat me bashkimin pas pritjes disa vjeçare. Kryeministri Rama tha se tashmë bëhet fjalë për një rrugëtim për jetë a vdekje në në vrapin e fundit drejt anëtarësimit të plotë. Eurokomisioneri Varhelyi dhe Borell vlerësuan përpjekjet e qeverisë dhe thanë se tashmë duhet konsensus politik për të ecur më tej.
