Ish-ministri socialist tha se ekonomia është përqendruar në duar të pak biznesmenëve, të lidhur me qeverinë dhe se PS-ja ka tradhtuar socialistët e thjeshtë, të cilët janë lenë papunë dhe pa përspektivë, sikurse krejt shqiptarët. Po kështu në lidhje me keqpërdorimin e të dhënave personale për çdo qytetar, ish-ministri shtoi se duhej që prokuroria të bënte arrestime.
Ish-ministri Ditmir Bushati u la jashtë listave kandidatëve për deputetë nga Edi Rama duke synuar t’i ndërpresë karrierën politike një prej figurave të reja më premtuese në Partinë Socialiste. Ish-ministri në tetë vite nuk u përfol për korrupsion apo abuzime, por në debatin për ndarjen e Kosovës mbajti një qëndrim prej shtetari dhe patrioti, ndaj në shenjë hakmarrje u zëvendësua në garën e 25 prillit me kandidatë anonimë, drejtorë të tenderave dhe njerëz që as socialistët nuk i njohin. Veç largimit nga gara, Ditmir Bushati po përballet dhe më një bojkot të mediave pro qeverisë dhe anashkalim të tezave apo ideve të tij për të majtën dhe PS. Shkurt Edi Rama ka urdhëruar që Ditmir Bushati të fshihet nga historia e kaluar dhe kuptohet nga projektet e ardhshme në PS.
Ndaj ish-ministri ka zgjedhur që të komunikojë me qytetarët në rrjetet sociale duke shpalosur idetë e tij politike për të majtën, fushatën elektorale dhe debatet kryesore në vend. Dje, ka ftuar qytetarët që ta ndjekin në Instagrim dhe iu është përgjigjur pyetjeve të të majtëve dhe të djathtëve që i kanë kërkuar mendim. Në përgjigjet e tij, Bushati ka folur hapur, pa sharje dhe qejfmbetjet ndaj PS, por ka treguar të vërtetat që sipas tij dëmtojnë sot PS dhe gjithë politikën. I pyetur se cilat janë planet e tij për politikën, Bushati ka deklaruar se do të vijojë të jetë në politikë dhe të punojë për PS, e cila duhet të jetë ndryshe nga Partia Socialiste që drejton sot Edi Rama. Bushati tha se PS ka nevojë të organizohet ndryshe, të kthehet të boshti i vlerave të majta dhe të ketë rregulla bashkëjetese. Sipas, tij këto rregulla janë deformuar në PS dhe kanë nevojë të rikthehen në mënyrën me moderne të mundeshme. Në qëndrimin e tij, Ditmir Bushati bëri dhe një akuzë të hapur për Edi Ramën duke deklaruar se sot socialistët janë ftuar të votojnë njerëz që kanë vjedhur vota. “Njerëzit duhet të dinë për çfarë votojnë, votojnë për një parti me një program të caktuar, një ekip që është i gatshëm të marrë në dorë fate te tyre dhe një lider në krye të këtij ekipi. Shqetësimi im kryesor ka qenë dhe mbetet me njerëz që e kanë krijuar karrierën politike në PD, duke blerë vota, më pas kanë shkuar në LSI, duke blerë vota, dhe sot i ofrohen PS, për të blerë vota. Apo njerëz që e kanë nisur në partinë Demokristiane dhe sot janë me PS”,- u shpreh Ditmir Bushati. Deklarata e Bushatit, e thënë ndryshe është një akuzë e fortë ndaj Edi Ramës, i cili rezulton se ka mbledhur llumin dhe emrat më problematikë për partive të tjera për të vjedhur votat. Kjo nuk ishte akuza e vetme e Ditmir Bushatit në qëndrimet djeshme. Ish-ministri ka kritikuar hapur dhe modelin ekonomik të Edi Ramës. Sipas tij, debati për taksat sot nuk ka vlerë, për sa kohë që ekonomia është në duart e pak njerëzve, ose të shtuquajturëve oligarkë. “Sot dëgjojmë një debat në lidhje taksimin, për mua është debat fals se kryesore janë themelet e shtëpisë sonë dhe më pas mund të mendojmë edhe për dritaren dhe çatinë. Ne kemi nevojë për ide të reja për ekonominë për të respektuar parimet kryesore të ekonomisë së tregut dhe mos e përqendruar pasurinë dhe pushtetin në një grusht njerëzish, për të çliruar garën në ekonomi, për të çliruar garën në administratë publike”,-tha Bushati. Ish-ministri ka sulmuar kryeministrin edhe për çështjen e skandalit të përdorimit të të dhënave personale nga PS. Sipas tij, kjo çështje duhet të kishte ngritur në këmbë gjithë institucionet e sigurisë, pasi kemi të bëjmë me keqpërdorimin flagrante të informacioneve private. Bushati tha se Shqipëria është vend anëtar i NATO-s dhe vjedhja e të dhënave personale është një çështje e sigurisë kombëtare. “Ne jemi një vend anëtar i NATO-s ndaj nuk mund të mohojmë një shqetësim. Të gjithë ata që mbledhin të dhënat duhet të pezullohen deri në përfundim të hetimit dhe në fund drejtësia duhet të thotë fjalën e vet. Drejtësia nuk mund të përdoret si justifikim për të mos iu përgjigjur një shqetësimi të tillë publik. Edhe unë kam pasur të dhëna, por jo ato personale, sepse çdo parti bën listën që mendon se i ka votues”,- tha Ditmir Bushati.
Ditmir Bushati la të kuptohej se PS-ja ka nevojë të kalojë në opozitë që të ribëhet me themele të së majtës
