Nga Sonila Tanku-DAIU
Propaganda vazhdon të mbetet misioni kryesor i qeverisë. Propagandë e cila prevalon mbi interesimin për njerëzit që vuajnë për mbijetesë. Në ditët më të vështira për qytetarët, ata janë aty, por jo për të ndihmuar, po për të propaganduar e ‘shitur’ të vërtetën imagjinare.
Teksa njerëzit vuajnë nga skamja e varfëria, ata dhurojnë një pako ushqime, shoqëruar me 7 fotografë.
Tërmeti la dëme kolosale, po u harrua me kronikat e ndërtimit të një shtëpie, ndërkohë që dhjetëra familje janë ende në çadra, në të ftohtin e shkurtit një vit më pas.
Ministria e Arsimit u krenua me fushatën për digjitalizimin dhe dhurimin e tabletëve, ndërkohë u zbulua qartë kriza që arsimi pësoi nga goditja e COVID-19.
Për çdo përmbytje, fajin e ka moti dhe asnjëherë dështimi i tyre për t’i siguruar qytetarëve infrastrukturën dhe kushtet e nevojshme.
Dhe vazhdon po i njëjti skenar me fotot e lumtura të borës që ra në të gjithë Shqipërinë. Me fotot ku punëtorët në 2021 hedhin kripë me lopatë, ku emergjenca shëndetësore është shndërruar në një matje tensioni në borë.
Kjo është propaganda e shëmtuar e tyre, e kundërta e realitetit që shqiptarët po jetojnë çdo ditë. Çfarë duhet të ndodhë ende?
Zgjohuni dhe merrni në dorë drejtimin e jetës suaj, mos e lini atë në dorën e një qeverie që nuk i intereson asgjë më shumë sesa propaganda dhe dëngat e saj!
