Shqipëria, që ethshëm ka thirrur e pritur të jetë pjesë e Europës, sot, të dhemb shpirti, tek sheh politikanë e politikane me trasta ndër duar, të mbushura me ushqime, gëzueshëm nëpër ekrane mediash, u drejtohen, ma do mendja mbështetësve të tyre, për të ofruar ndihma.
Dy Shqipëri të ndryshme, cilës t’i besosh?!
Në fakt, Shqipëria dhe shqiptarët nuk kanë nevojë për ndihma, nuk kanë nevojë as për lëmoshë!
Shqipëria dhe shqiptarët kanë nevojë për punë, për projekte, për vizion, për besim, për shpresë, për zhvillim, për frymëmarrje, për hapësira biznesi, për siguri, për atdheun e tyre, për kombin e tyre!
Shqipëria dhe shqiptarët janë të pasur, nuk kanë nevojë për lëmoshë, ata kanë det, bregdet e lumenj të mrekullueshëm, kanë liqene, male e vargmale mahnitës, kanë pasuri të çmuar nëntokësore, kanë diell, kanë natyrë e klimë të pashoqe, kanë agro-produkte e bimë medicinale të panumërta, e mbi të gjitha, janë një komb me tradita, zakone, vlera e virtyte të jashtëzakonshme!
Ndaj, lutem, mos shpërndani ndihma, por mbillni shpresë dhe forcë besimi, mbillni atdhe dhe të ardhme ndër shqiptarë, sepse shqiptarët vlejnë, madje fort më shumë, se nevoja juaj për shit – blerje!
Në Prill vdesin diktaturat e diktatorët, në Prill ngjallen shpresat, e ndaj, në Prill të presim ndryshimin e madh për të gjithë shqiptarët?✌?✌!
