Kryetari i Bashkisë Fushë-Arrëz, Z. Fran Tuci uron qytetarët me rastin e Vitit të Ri:
Qytetarë të dashur!
Nga thellësia e zemrës sime, uroj që viti 2021 të jetë një vit plot me lumturi, shëndet dhe shpresë për të gjithë Ju!
Më lejoni të dërgoj një përshëndetje të ngrohtë për të gjithë banorët e bashkisë Fushë-Arrëz kudo ndodhen, brenda vendit dhe jashtë tij!
Ju uroj të gjithëve një vit të mbarë me begati dhe shëndet në familjet tuaja!
Të nderuar Qytetarë!
Më lejoni t’ju kujtoj që viti 2020 ishte një vit i vështirë, pasi pandemia Covid-19, pllakosi njerëzimin duke e vënë përballë sprovës së madhe ekzistenciale, si dhe duke krijuar problematika të mëdha në sektorët strategjikë të zhvillimit ekonomik dhe social, gjë që ka patur ndikimin relativ në përmbushjen e angazhimeve institucionale.
Por, përpos kësaj, çmojmë dhe evidentojmë me krenari vlerat solidare të bashkisë Fushë-Arrëz, në mbështetjen e pakursyer dhe me mjaft peshë në përballimin e e deritanishëm të situatës, përmes ndihmave me ushqime dhe ilaçe për qindra familje të bashkisë Fushë-Arrëz dhe të njësive përbërëse, duke dhënë kontribut real dhe të drejtpërdrejt në zbutjen dhe përballimin e pasojave të pandemisë.
Ky vit i pazakontë, me ngarkesa dramatike dhe ndjesi të shumta jopozitive, pasi kemi humbur nga Covid-19 miq, të afërm, të njohur, duke na zhytur në një botë reflektive që kërkon forcë dhe energji për të vijuar më tej, le të shërbejë dhe si një apel për bashkimin e vullneteve të përbashkëta në ecjen para të zhvillimit ekonomik të bashkisë Fushë-Arrëz dhe të begatimit të saj në planin ekonomik dhe social.
Banorë të nderuar të Fushë-Arrëzit dhe të njësive administrative Qafë-Mali, Blerim, Iballe, Fierzë!
Përtej panoramës së problematikave të shkaktuara në nivel global nga pandemia, pohojmë me përgjegjësinë e kryerjes së detyrës, se misioni i përmbushjes së mjaft premtimeve konkrete ka vijuar me një bilac pozitiv, duke shënuar arritje të konsiderueshme për zhvillimin e qytetit, sepse me punën tonë kemi mbajtur ritmet e duhuara si dhe kemi përfunduar së investuari projekte që dukshëm kanë transformuar bashkinë në orientimin dhe drejtimin e pandalshëm drejt zhvillimit.
Përveç investimeve në infrastrukturë, në rrugë, sheshe e objekte social-kulturore dhe arsimore, kemi punuar për turizimin dhe zhvillimin kulturor, por dhe për bujqësinë e pyjet. Kemi investuar në shkolla e kopshte, të cilat janë domëthënia e madhe e vizionit tonë për gjeneratat e ardhshme.
Qytetarët e mi të nderuar!
Ky vit që po troket, me urimin konstant timin, që të jeni shëndetplotë Ju dhe familjarët tuaj, do të jetë viti i ndryshimeve dhe arritjeve akoma më të mëdha, sepse ne do të rritim përpjekjet tona për të përmbushur ëndrrat e të gjithëve Ju, dhe për të bërë një hap më të madh përpara në përmbushjen e plotë të vizionit tonë për zhvillimin e qëndrueshëm ekonomik të bashkisë sonë
Le të mbledhim të gjithë diturinë dhe forcën tonë kolektive, sepse vetëm kështu mund të bëjmë që bashkia Fushë-Arrëz të jetë akoma më e mirë: me shkolla më të mira, me kopshte dhe çerdhe akoma më të mira, me rrugë më të mirëmbajtuara. Një qytet i mirëqënies moderne, qytet i zhvillimit për një ekonomi më të mirë dhe me perspektivë të re për të gjithë shtrirjen territoriale të kësaj bashkie.
Unë besoj tek Ju, dhe bashkë me Ju do të çojmë para objektivin e transformimit të bashkisë sonë në një hapësirë atraktive dhe shpresëdhënëse.
Le të
ecim përpara së bashku dhe të krijojmë të ardhmen tonë me besim dhe shpresë.
Vetëm me pjesëmarrjen dhe bashkëpunimin Tuaj, ne do të jemi në gjendje që ta
kthejmë Fushë-Arrëzin në një shoqëri në të cilën të mund te jetohet dhe ku
gjithçka ecën dhe ndryshon shumë shpejt, një qytet ku te gjithë të ndjehemi
pjesë e tij, për ndërtimin e të ardhmes së të cilit punojmë të gjithë;
Më lejoni përsëri t’Ju falenderoj përzemërsisht për mbështetjen dhe
bashkëpunimin Tuaj!
Dhe një herë Ju uroj të gjithëve që ky vit i Ri t’ju sjellë gëzim, mirëqënie dhe shëndet në familjet tuaja!
Faleminderit!
Kryetari
Fran Tuci
