Koronavirusi i ri është kryesisht sëmundje respiratore dhe përhapet më tepër përmes grimcave nga tështimat dhe të kolliturat nga një person i infektuar.
Grimcat me virus mund të mbijetojnë për një kohë të caktuar, por kjo varet nga shumë faktorë, si lagështia, temperatura dhe sipërfaqja e objektit.
Aktualisht nuk ka të dhëna për koronavirusin e ri se sa mund të mbijetojë në sipërfaqe, por shkencëtarët thonë se jetëgjatësia është e ngjashme me viruset e tjera.
Sipas një studimi kinez të publikuar sot, koronavirusi i ri mbijeton rreth 30 minuta në ajër. Por kjo nuk është konfirmuar ende nga studiues në perëndim.
Sa mbijeton koronavirusi në sipërfaqe?
Nëse do të shohim mbijetesën e virusit SARS, që është po në familjen e koronaviruseve, atëherë kemi këto periudha mbijetese:
Në një temperaturë prej 20 gradë celcius, SARS mbijeton në sipërfaqe hekuri për 4 ditë, në sipërfaqe druri dhe xhami për 2 ditë dhe 5 ditë në metale, qeramikë dhe plastikë. (Ky studim gjeti se një lloj SARS-i mbijetoi 9 ditë në një sipërfaqe plastike në temperaturë dhome).
SARS mbijetoi për 2 deri në 8 orë në alumin dhe më pak se 8 orë në lateks.
Shkencëtarët thonë se sipërfaqet me pore si rrobat dhe flokët e vështirësojnë transmetimin e virusit.
Paratë e transmetojnë virusin, po ashtu edhe sipërfaqet metalike dhe xhami në smartfon. Ndaj duhet të keni parasysh, përveç larjes së duarve, të dezinfektoni rregullisht edhe këto sipërfaqe. Shmangni maksimalisht futjen e duarve në gojë, sy dhe hundë.
Megjithatë kjo nuk është aq e thjeshtë, një tjetër studim thotë se njerëzit e prekin fytyrën disa qindra herë në ditë.
Edhe temperatura bën një diferencë të madhe në mbijetesën e virusit.
Një studim tjetër gjeti se ndryshimi nga 20 gradë celcius në 30 gradë celcius gati e përgjysmoi jetëgjatësinë e virusit SARS në një sipërfaqe.
Si ta dezinfektoni sipërfaqen?
Autorët e studimit të fundit vunë në dukje se koronaviruset njerëzore mund të “inaktivizohen me efikasitet” në sipërfaqe brenda një minute nëse ato pastrohen me solucion që përmban 62% deri 71% alkool etanol, 0,5% peroksid hidrogjeni, ose hipoklorit natriumi 0.1%.
Shumë produkte dezinfektues pretendojnë se vrasin 99% të virusit. Kjo nuk është e vërtetë, edhe xheli dezinfektues është shumë pak efektiv në këtë drejtim, raporton newsbomb.al.
Studimi gjeti se nëse një person prek një sipërfaqe ku ka virus gripi, për 5 sekonda, 32% e virusit që ndodhet në atë sipërfaqe transferohet te njeriu.
