Ndonëse nuk është më kryetar i Bashkisë së Durrësit, Vangjush Dako është kryefjala e artikulimit politik të opozitës.
Pas vendimit të marrë nga Departamenti Amerikan i Shtetit për të shpallur Dakon së bashku me familjen e tij persona “non grata”, ai është rivënë sërish në qendër të akuzave nga ana e Partisë Demokratike.
Kryedemokrati Lulzim Basha akuzoi Dakon së bashku me Kryeministrin Rama, duke theksuar se e ka marrë në mbrojtje ish-kryetarin e Bashkisë së Durrësit. “Hajduti psikik po bën ç’të mundet që të harrohet bankomati i tij personal Vangjush Dako. Bën sikur nuk e di, nuk e sheh, nuk e dëgjon atë që sheh gjithë Shqipëria. Edhe pse SHBA e shpalli non grata Vangjush Dakon për përfshirje në raste të mëdha korrupsioni, ai nuk ka dalë para drejtësisë për asnjë rast korrupsioni.
Kjo, sepse Dako mbrohet nga Rama. Ai nuk është thjesht një politikan i korruptuar, por pjesë e krimit të organizuar, me të cilin vodhi zgjedhjet për llogari të pushtetit të Edi Ramës”, theksoi Basha në qëndrimin e tij për Dakon. Në vijim të argumentit, kryetari i Partisë Demokratike theksoi se vjedhja e zgjedhjeve në Durrës është bërë me mbrojtjen e Edi Ramës, duke shtuar se largimi i Kryeministrit është zgjidhja për të shkëputur lidhjet e krimit me politikën. “Vjedhjet e zgjedhjeve me krimin dhe grabitja e Durrësit janë bërë me mbrojtjen, dijeninë dhe për përfitimin e Edi Ramës që e mbron Vangjush Dakon, si bankomatin personal të parave të pista. Edi Rama i mbron kriminelët brenda dhe jashtë politikës, sepse me ta e merr dhe e mban pushtetin.
Prandaj, largimi i Edi Ramës është zgjidhja për të shkëputur lidhjet e politikës me krimin, për të vënë qeverinë në interes të qytetarëve, jo të krimit dhe të oligarkëve me të cilët Rama vjedh dhe grabit çdo ditë shqiptarët”, shkroi Basha. Kryedemokrati u kujdes që çështjen “Dako” ta rikthente në vëmendje edhe nëpërmjet përgjimeve që publikoi tabloidi gjerman “Bild” pak muaj më parë, ku dilnin biseda të reja ndërmjet ish-kryetarit të Bashkisë së Durrësit me Astrit Avdylajn, i njohur si kreu i bandës së Shijakut.
Këtë video Basha e shoqëroi me një koment duke theksuar: “Pse hesht hajduti psikik për bankomatin e tij personal? Pse fshihet përditë pas mashtrimeve për 6 kullat 200 milionë euro dhe nuk belbëzon asnjë fjalë për Dakon? Pse ka emëruar e po emëron vetëm kamikazë dhe shërbëtorë të krimit dhe të hajdutëve me pushtet në Prokurorinë dhe drejtësinë e kapur? Përgjigjet i gjeni vetë në fjalët e treshes Rama-Dako-Avdylaj”.
