Menaxhimi i problematikave të pushtetit lokal, veçanërisht në bashkitë e majta, është pasqyrim i filozofisë qeverisëse që karakterizon maxhorancën politike, e cila përveçse e shkëputur nga realiteti, shfaqet dhe prepotente duke mos adresuar siç duhet zgjidhjet për një sërë fenomenesh që tashmë janë kthyer në probleme serioze për komunitetet e tyre administruese.
Një gjë e tillë ndodh dhe në bashkinë e Malësisë së Madhe, ku prej kohësh banorët ankohen për një problematikë të krijuar, që ka të bëjë me mbetje thertoresh, e cila edhe pse ngrihet zëri fuqishëm, autoritetet vendore ngrenë supet, duke treguar ose pazotësi, ose implikim në këtë çështje.
Në mbledhjen e fundit të Këshillit Bashkiak Malësi e Madhe, këshilltarja e PD, Mimoza Rexhvelaj, ka ngritur një shqetësim, se kjo zonë po kthehet në landfill me mbetje mish derri që vjen nga Mali i Zi.
Këshilltarja Rexhvelaj, në këtë mbledhje, ka denoncuar fuqishëm mosreagimin e kreut të bashkisë, si dhe ka kërkuar sqarim të mëtejshëm nga organet ligjzbatuese, pasi një situatë e tillë, është e papranueshme dhe e patolerueshme në dëm të komunitetit.
Ja reagimi i plotë që këshilltarja demokrate në këtë bashki, ka bërë në lidhje me problematikën në fjalë:
Në mbledhjen e Këshillit Bashkiak ku detyra jonë është të sjellim shqetësimet e banorëve. Të jemi zëri i tyre në çdo kohë. Ka tre ditë që jam njohur me shqetësimin e banorve të fshatrave Sterbeq, Jubicë e Kamicë në Njësinë administrative Qendër, ku prej më shumë se tre muajsh po bëhet ndotja e mjedisit nga hedhja e pa përgjegjshme e mbetjeve të thertoreve, të cilat ende nuk është e qartë se nga vijnë por banorët pretendojnë se janë mbetje nga Mali i Zi dhe depozitohen aty. Me çfarë leje? Me çfarë procedure? Nuk e dim… as Bashkia nuk e di… Ne nuk kemi një “Landfill” nuk kemi as një projekt, një leje mjedisore, apo informacion për këtë rast, ndaj duhet t’u bëj thirrje publike prokurorisë, organeve kompetente, mediave të bëjnë hetime për këtë SKANDAL që po rrezikon jetën e barorëve, në plasjen e një epidemie nē këtë zonë. Jeta e banorëve është në rrezik. Era e keqe është e padurueshme. Temperaturat e larta e keqësojnë gjëndjen. Duhet ndërhyrje orgjente në ndalimin e këtyre kamionve të mos sjellin më, dhe dizifektimin e zonës, groposjen e pastrimin e këtyre mbetjeve. Të vendosën para përgjegjësisë ata që janë shkaktarët e kësaj situate!
