Studentët shqiptarë braktisen dhe në ditën ndërkombëtare.
Sot është dita e tyre, por Ministria që rrëmben letrën higjenike të vetën, nuk ka se si të mos rrëmbejë dhe gëzimin studentor.
Shoqatat studentore sot përçmohen dhe mbështetja financiare për to nga Ministria është zero.
Ulja e përfaqësimit në organet drejtuese universitare dhe zbehja e rolit të tyre, nëpërmjet Ligjit të mbrapshtë të Arsimit të Lartë, synon fikjen e zërit të pjesës më vitale të vendit.
Kjo ditë, e gjen rininë studentore në dëshpërimin e thellë të nxitjes për të braktisur vendin.
– 79% e tyre duan të largohen nga sytë këmbët, larg krimit, korrupsionit e mungesës së perspektivës.
– Studentët shqiptarë, ndryshe nga homologët e tyre evropianë, vuajnë sot tarifat skandaloze, cilësinë tronditëse të diplomave dhe papunësinë e pashmangshme.
– I nënshtrohen një procesi pranimi kaotik, pa meritë e preferencë.
– Mësojnë në Universitete publike që sillen si private, pa kampuse e pa infrastrukturë të duhur dhe në Universitete private që mundohen të imitojnë ato publike.
– Për to, mungojnë tërësisht mjediset e edukimit mbështetëse dhe parandaluese, të cilat ndikojnë drejtpërdrejtë në shëndetin mendor dhe mirëqënien e përgjithshme të studentëve.
– Ndërsa mjediset e tjera universitare janë stresuese e larg standarteve europiane.
Vetë ESU (Unioni Europian Studentor) në këtë ditë, insiston në kërkesat e tij:
1. Edukimi për shëndetin mendor të jetë pjesë e kurrikulës kombëtare,
2. Mbështetje falas dhe me cilësi të lartë psikologjike dhe mentoruese
3. Kontrolle mjekësore falas për të gjithë studentët,
4. Procesi i mësimdhënies me në qendër studentët si dhe përfshirjen e të gjithë studentëve, pavarësisht formimit apo prjeardhjes së tyre.
