Ibsen Elezi, kandidat për kryetar i PD, ka nisur fushatën sot nga Kukësi. Ai ka thënë se Sali Berisha po i shmanget debatit me të dhe rruga e ish-kryeministrit është një rrugë qorre.
Elezi thotë se PD nuk mund të ketë bashkëpunim me Ilir Metën, siç bëri ish-kryeministri Berisha më 6 mars. “[…] ne po luajmë në politikë këtu, nuk po bëjmë biznes, nuk duhet të jetë qëllim primar qenia në pushtet”, thotë ai ndër të tjera.
Pjesë nga fjala e Ibsen Elezit
“Pse Berisha i shmanget debateve, që i kam kërkuar të kemi përballë. Rruga e tij është një rrugë qorre, nuk na çon askund, duhet të bëjmë gjithçka për të shtrirë numrin e anëtarësisë sonë. Na duhet një mekanizëm që të përballemi me këtë sistem që kemi përballë.
Kemi të bëjmë me një kundërshtar që është i organizuar, në të gjitha nivelet. Nuk mund të kemi kurrsesi bashkëpunim me Ilir Metën, sepse është një parti që i përket boshtit të majtë, ne po luajmë në politikë këtu, nuk po bëjmë biznes, nuk duhet të jetë qëllim primar qenia në pushtet.
Edi Rama nuk e ka krijuar vetëm hegjemoninë e tij në Shqipëri, e ka krijuar së bashku me këta të tjerët. Partia është e hapur, por në momentin që ti do kthehesh duhet të nis karrierën nga e para”, tha Elezi.
Në fjalën e tij, Elezi ka akuzuar drejtpërdrejtë Berishën se është futur në garën për kreun e PD-së për të përmbushur qëllimet personale dhe jo për të çuar drejt rrugës së fitores këtë forcë politike.
“Strategjia e PD nuk duhet të jetë strategjia e bashkimit që ju ka çuar Sali Berisha. Është rrena më e madhe. Rruga e Sali Berishës është rrugë qore dhe nuk çon në fitore. Dhe Sali Berisha po tregon se nuk ka interesin të çojë PD në fitore por të bëhet kryetar i partisë. Dhe kjo më bën mua të dal dhe të diskutoj me njerëzit për ide dhe vlera demokratike”, u shpreh Elezi.
Më tej ai e sulmoi ish-kryeministrin edhe për raportin e ngushtë që ai ka pasur ndër vite me ish-kreun e PD, Lulzim Basha, duke theksuar se Berisha e mbronte ndërkohë që demokratët e cilësonin një lider të dështuar.
“Pse në 2019, pse në 2021 i kemi thënë të dera e PD-së nuk mban më ujë pilafi. Lulzim Basha po e shkatërron PD-në. Në 2013, Sali Berisha për kundërpërgjigje tonën vuri në dispozicion gjithë njerëzit e vetë për ta zgjedhur në 13 qershor dhe në Kuvendin Kombëtar e mori për qafe”, tha ai.
Elezi është ndalur edhe te bashkëpunimi që Partia Demokratike ka pasur me LSI-në në opozitë, duke u shprehur qartë kundër një bashkëpunimi me këtë forcë politike apo Ilir Metën në rast fitoreje të tijën.
“Kurrsesi bashkëpunim me Ilir Metën, se po e more Ilir Metën merr 100 mijë vota, por humb 50 mijë dhe 100 mijë vota të tjera. Kjo nuk shkon, se është i majtë. Nëse LSI do ishte një parti e djathtë e cila ka një bosht ideologjik njëlloj me ne, dakord, por ne nuk mund të lozim cic-mic”, deklaroi Elezi.
Ndërkohë sa i përket akuzave të ish-deputetes Rudina Hajdari lidhur me marrëdhënien e tij të afërt me kreun socialist të Bashkisë së Kukësit, Safet Gjici, Elezi u shpreh se me të ulet në kafe sepse është Presidenti i Kukësit.
“Rudina Hajdari del me një parti të majtë brenda Partisë Demokratike dhe më akuzon mua në Kukës që s’kam qenë në parti. Unë kam qenë në krah të Flamur Hoxhës, dhe kam qenë kur është prezantuar. Arrijnë dhe më akuzojnë mua se jam njeriu i Safet Gjicit. Seç lidhje kam unë me Safet Gjicin?! Këta i kanë dhënë miliona euro në Tiranë e kanë bërë biznesmenin më të fuqishëm dhe tani me kthehen mua”, nënvizoi ish-kreu i PD në Kukës.
