Teksa në anën tjetër të bulevardit “Dëshmorët e Kombit” në sheshin “Skënderbej” tregohet forca ushtarake e stërvitjes më të madhe në rajon “Defender Europe 2021”, në sheshin “Skënderbej” ka nisur një marshim protestë për fëmijët e abuzuar.
Protesta e nxitur nga shoqëria civile pak ditë pas abuzimit të rëndë të një 15-vjeçareje nga disa burra në Mirditë, ka sjellë mesazhe të forta.
Qindra qytetarë, pjesa më e madhe vajza, aktivistë të shoqërisë civile kanë protestuar kundër abuzimit ndaj fëmijëve.
“Përdhunues si i shikon në sy fëmijët e tu?”, “Mos ma vrit fëmijërinë, eduko djalin”; “Ne jemi me ty”; “Ti s’je vetëm” e parulla të tjera të ngjashme janë ngritur në protestë nga pjesëmarrësit. Me daulle e thirrje marshimi ka vijuar për disa metra, për t’i thënë jo dhunës.
