Nga Era Dushi
Bilanci është i tmerrshëm, një fëmijë në 5 ditë përdhunohet në Shqipëri. Nuk kam fjalë dhe as zemër për ta pranuar këtë realitet të ndyrë e të fëlliqur që cënon fëmijët dhe të rriturit, përdhunimi. A u mbaruan gratë, a u mbaruan burrat që jua vrisni fëmijërinë të vegjëlve?!
A ju la mendja, a ju vdiq ndërgjegjja që këto veprime të turpshme e shkatërruese i bëni ditën për diell?! Si të “ngrefet” or shok me fëmijën tënd, me mbesën, nipin, me një fëmijë çfarëdo?! Ata nuk janë formuar e zhvilluar ende e ju justifikoheni se “ju hëngri vetë”. Si jua ngref një 6- vjeçare, duke mësuar alfabetin? Po një 15-vjeçare, duke e droguar e shantazhuar? Një grua, nga minifundi jua ngref?!
TURP!
Imoralitet nuk është veshja, lakuriqësia, provokimet, imoralitet është instikti kafshëror që nuk dini ta mbani nën kontroll. E për të plotësuar nevojat tuaja nuk shikoni më nga sytë dhe nuk doni të dini se po vrisni dikë. Ju meritoni jo tredhje, por vrasje. Mikun tuaj mes shalëve nuk e ngref çdo “vrimë”, por nuk thonë kot se nëse do të doja të kryeja vetëvrasje do të hidhesha nga niveli i injorancës tek niveli i inteligjencës së meshkujve shqiptarë. Ju ngrefet truri dhe ju stopon logjika.
Po aq faj sa ju kanë nënat tuaja që ju rriten me idenë se “çuni është çun”, se gruaja nënshtrohet dhe kështu ju u kthyet në mostra të fëlliqura pasi për këto veprime ju rrahin shpatullat, nuk ju gjuajnë fytyrën. E po ato nëna e gra që rrinë oborreve pallateve, dritareve e ruajnë çdo lëvizje të vajzave të lagjes, janë fajtore. A e pe filanen si ishte ngref?!
Shoqëri paragjykuese! E sa raste shantazhesh ka, ku viktima shantazhohet të heshtë, ku shteti mbyll sytë për pak lekë, e ku drejtësia është në anën e abuzuesit…..
Por këto nuk janë arsye të heshtësh, as turpi, as familja, as institucionet e paralizuara mos i lejo që ta mbyllin dhimbjen brenda teje. Fol, bërtit, drejtoju çdo kujt, se një dritë jeshile do të ndizet për ty. Abuzuesi nuk ka falje, bëje për vete dhe bëje që të tjerë të mos përjetojnë të njejtën traumë si ti.
DENONCO, PROTESTO, KTHEJE DHIMBJEN NË FORCË…..
Dënoje abuzuesin! (E. D)/InfoPressAlbania/
