Nga Red VARAKU
Qarku i Durrësit është qarku më i rëndësishëm nga pikëpamja elektorale dhe qarku ku do të vendoset dhe fati i këtij kryeministri. Kjo sepse aty më shumë se kudo tjetër, sot bashkohen të gjitha sfidat e Shqipërisë dhe modelet e dështuara apo të rrezikshme të zhvillimit që janë eksperimentuar deri tani nga ky kryeministër.
Në këtë kuptim, ai është vërtetë qarku simbol i kësaj fushate dhe duke qenë kështu ,qëndrimi politik i një partie që tenton një mandat të tretë, është i një rëndësie të veçantë për shkak të mesazheve politike që kjo forcë politike do të tentojë të përcjellë në të gjithë Shqipërinë.
Një tjetër arsye që e bën qarkun e Durrësit shumë të rëndësishëm, është se ai është një ndër qarqet ku humbja e PS përllogaritet të jetë më e thellë se në të gjitha qarqet e tjera ndaj angazhimi kryesor i tyre nuk është fitorja , por zvogëlimi i humbjes.
Kjo për shkak të batërdisë që ka shkaktuar Vangjush Dako si Kryetar i Bashkisë dhe për shkak të publikimit të përgjimeve, ku dukej qartë përdhunimi që ky njeri i kishte bërë vullnetit të qytetarëve.
Jane pikërisht këto arsye që e shtynë Edi Ramën të kandidojë dhe në Durrës duke ftuar Ter Kokën, me qëllim zvogëlimin e humnerës ku ndodhet aktualisht PS në këtë qark dhe me shpresë se mund t’i gënjejë durrsakët .
Nëpërmjet kësaj strategjie kriminale elektorale është e qartë pse Edi Rama, edhe pse i di mirë arsyet e rrënimit të PS qoftë në Durrës, qoftë në të gjithë Shqipërinë, vazhdon me të njëjtin qëndrim poshtërues ndaj votuesit shqiptar dhe atij durrsak në veçanti.
Nese vërtetë do ta donte Durrësin ai mësë pari duhet t’i kërkonte falje qytetarëve durrsakë për kandidimin e Dakos dhe dorëzimin e këtij qyteti në duart e bandave më të rrezikshme të Shqipërisë , ndërsa në vend të pazareve me Ter Kokën, ai duhet të kërkonte vetëm një aleancë, aleancën e qytetarëve të ndershëm.
Vetëm duke i hequr mbrojtjen politike Vangjush Dakos dhe duke iu rikthyer aleancës me qytetarët, ai do të mund të jepte një mesazh të qartë shprese për një mandat të tretë.
Por, në vend që të ishte në qeli Vangjush Dako vazhdon të drejtojë Bashkinë e qytetit të dytë më të rëndësishëm në vend, ndërsa Ter Koka vazhdon të trafikojë interesat e qytetarëve durrsakë për interesin e tij personal.
Në mënyrë poshtëruese, Edi Rama ka menduar që të përdorë fatkeqësinë që goditi Durrësin, Shijakun dhe Krujën jo vetëm si presion dhe shantazh ndaj qytetarëve të dorëzuar përballë kësaj fatkeqësie , por dhe si makiazh për imazhin e tij të rrënuar.
Por i ka bërë llogaritë gabim! Durrsakët, shijakasit dhe krutanët nuk janë aq frikacakë sa i mendon ky kryeministër. Tashmë, ata e kanë të qartë nga përgjimet se si ky njeri ka bastarduar dhe trafikuar vullnetin e tyre tek banditët dhe e shikojnë çdo ditë batërdinë që ka prodhuar babëzia e këtyre individëve të veshur me kostum politik pikërisht nga ky kryeministër .
Ata nuk janë bagëti që mund të drejtohen me kamzhik dhe tagji drejt kutive të votimit siç mund ta mendojë kryeministri . Ata nuk mund të pranojnë të përfaqësohen nga dhunuesit e tyre dhe fëmijëve të tyre. Ata kanë ditur t’ia tregojnë vendin zullumqarëve dhe të kthehen në qark simbol të ndryshimit në të gjithë Shqipërinë ashtu si në 2005, ku PS mori poshtërimin që meritonte duke humbur tetë me zero.
