Ish-deputeti i PD-së, Helidon Bushati, ka akuzuar qeverinë në lidhje me situatën e krijuar në qarkun e Shkodrës pas përmbytjeve të shkaktuara, si pasojë e reshjeve të dendura.
Në një prononcim për mediat, Bushati i bëri thirrje Ramës që të shpall gjendjen e fatkeqësisë natyrore në Shkodër.
Mes të tjerash Bushati tha se në këtë qark situata është në situatë alarmante dhe se uji po rrethon Shkodrën.
“Kjo qeveri e ka braktisur Shkodrën duke i lënë qytetarët në mëshirë të fatit. Ka më shumë se 1 muaj që zona e Nënshkodrës është e përmbytur, sepse qeveria nuk vë dorë. Hakmarrja politike e Edi Ramës po bie sot mbi çdo fëmijë, mbi çdo grua dhe çdo banor të qarkut tonë.
Asnjë ndihmë, asnjë qindarkë, asnjë mbështetje që përmbytjet të mos ndodhin ose, të paktën, që uji të largohet shpejt. Kjo hakmarrje politike e kryeministrit në ikje është diskriminuese dhe për shkodranët.
Nuk ka asnjë masë, asnjë ndërhyrje. Heshtje, moskokëçarje, harrese e plotë, ndërsa banorët përballen me kërcënimin e jetës dhe mundi i tyre në bujqësi, blegtori dhe frutikulturë është shkatërruar. Ky kryeministër tallet me qytetaret. Babëzia, korrupsioni, mllefi ndaj shkodranëve që nuk e votojnë, e ka verbuar!
Janë më shumë se 4 mijë hektarë toka të permbytura! Alarmi po bie për qytetin, pasi uji po rrethon Shkodrën. Keni parë ndonjë qeveritar? Keni dëgjuar ndonjë vendim për të lehtësuar gjendjen? Asnjë! Edi Rama duhet të shpallë menjëherë gjendjen e fatkeqësisë natyrore. Ai nuk duhet të thellojë akoma më shumë dhe në kurriz të shkodranëve dështimin e tij 8 -vjeçar.
Në 25 prill, qytetarët e Shkodrës do ta mbajnë mend këtë ditë të vështirë, kur u braktisën plotësisht nga Edi Rama dhe të deleguarit e tij në Shkodër. Shkodra dhe Shqipëria ka 8 vjet në baltë me Ramën. Ka ardhur koha të ndryshojmë. Më 25 prill Rama do të humbë dhe do të fitojë Shkodra dhe Shqipëria.”, tha midis të tjerash Bushati.
