Nga Elona CASLLI
-Nuk më frymëzon Lulzim Basha!- është pohimi që artikulohet nga një kategori e caktuar njerëzish.
Lulzim Basha nuk është poezi. Është kompromis.
Lulzim Basha është marrëveshje që arrijnë dy palë kundërshtare duke i bërë lëshime njëra-tjetrës.
E thënë shkurt, Lulzim Basha është pajtim me lëshime.
Kushdo nga ne bën kompromise në jetë. Në jetën e përditshme bëjmë kompromise në punën tonë, në marrëdhënie me kolegët tanë, me eprorët tanë e me shumëçka tjetër.
Nuk kam dëgjuar dikë deri më sot të thotë- Nuk më frymëzon përgjegjësi,drejtori, apo titullari.
Atëherë, si është e mundur që në të përditshmen tonë e ndiejmë krejt të natyrshëm kompromisin dhe në rastin e opozitës e refuzojmë këtë të fundit?!
Refuzimi i kompromisit me opozitën do të ishte krejt i natyrshëm, kur do të kishim refuzuar çdo lloj kompromisi tjetër në jetë. Në rast të kundërt, është krejt i pakuptimtë.
Jo rastësisht e kam quajtur Lulzim Bashën kompromis. Mund ta kisha quajtur e ardhmja ndryshe e Shqipërisë, lideri i së ardhmes e plot gjëra të tjera.
E quaj kompromis pasi e konsideroj të vetmin mekanizëm ekzistues, që mund të përmbysë situatën politike në vend. Kur them mekanizëm ekzistues, nuk nënkuptoj mekanizmin më të kulluar dhe më të shëndetshëm. Nënkuptoj mekanizmin më të sigurt që mundëson ndryshimin e situatës aktuale.
Nëse do të trajtonim çështjen poetikisht, do të thonim që 8 muaj para zgjedhjeve krijohet një mekanizëm i fortë që e zhduk përgjithmonë kastën aktuale të politikanëve dhe parlamenti mbushet me njerëz me integritet dhe Shqipëria ndahet përfundimisht nga e shkuara. Trajtimin poetik të çështjes mund ta bëjë një i marrë, një i dehur ose një mekanizëm i tërthortë i Rilindjes.
Një mendje e kthjellët gjykon se ka një hendek shumë të madh midis dëshirës së një njeriu dhe mundësisë për ta përmbushur atë.
Duke qenë se po flasim për kompromis dhe jo për poezi, duhet të pohojmë faktin që opozita e bashkuar mbetet i vetmi mekanizëm ekzistues i cili mund ta përkthejë votën me përfaqësim në parlament.
Dhe përkthimi i votës në përfaqësim do të thotë rrotacion politik.
Post Scriptum- Nëse doni të frymëzoheni, lexoni poetë!
