Philippe Coutinho u fishkëllye nga tifozët e vet gjatë fitores së Barcelonës 2:1 kundër Real Sociedadit në Camp Nou, pak ditë pas festimit të tij kontrovers.
Mesfushori braziliani shkaktoi polemika në mesjavë, kur i vendosi gishtat në veshë pasi shënoi një supergol kundër Manchester Unitedit në Ligën e Kampionëve, një gjest që nga disa u cilësua si mesazh i Coutinhos ndaj kritikëve të tij, transmeton Gazeta Express.
Duket se një pjesë e tifozëve në Camp Nou e kanë mbajtur në mend këtë, të cilët e fishkëllyen braziliani kur u zëvendësua në pjesën e dytë të triumfit të Barçës ndaj Sociedadit të shtunën mbrëma.
Trajneri Ernesto Valverde kishte tentuar t’i japë fund çështjes së festimit të tij gjatë një konference për media të premten, por tifozët katalonas u duken të jenë akoma të zemëruar me të.
