Ish-prokurori Eugen Beçi, ka deklaruar se në lidhje me çështjen “Partizani”, GJKKO ka gjetur një lidhje të kryeministrit Edi Rama me faktin penal, përderisa ka pranuar kërkesën e mbrojtjes për ta thirrur atë në cilësinë e dëshmitarit.
I ftuar në emisionin “Kjo javë” në News24, Beci tha se fakti që është pranuar kërkesa për të thirrur si dëshmitar kryeministrin Edi Rama, në cilësinë e ish-kryetarit të Bashkisë së Tiranës në atë periudhë, tregon se gjykata ka vlerësuar se ka rrethana dhe të dhëna që kanë lidhje drejtpërdrejt me akuzat, me faktin penal.
“Personi që do të thirret e ka bindur mbrojtja gjykata që personi që do të thirret ka rrethana dhe të dhëna që kanë lidhje drejtpërdrejt me akuzat, me faktin penal. Dhe fakti që gjykata e pranon që të pyetet një person si dëshmitar, tregon se ky ka shumë të dhëna të dobishme që mund të sqarojnë procesin”, tha ai.
Teksa u ndal te mundësia që Rama të mos paraqitet personalisht dhe të përfaqësohet nga avokati, Beçi tha se procedura është e qartë.
“Gjykata pasi merr vendimin njofton me fletëthirrje kudo që ndodhet, dhe në rast se personi nuk paraqitet në ditën e caktuar për shkaqe jo objektive, GJKKO urdhëron thirrjen e tij përmes policisë gjyqësore, faza tjetër është shoqërimi i detyrueshëm, me forcë dhe shoqërimi i kësaj me një gjobë 30 mijë lekë“, tha ish-prokurori.
