Gjatë preznatimit të ministrit të Drejtësisë, Besfort Lamallari, Edi Rama vazhdoi sërish me “show-n” e ministres virtuale “Diella”, ku tha se ajo do të lindë fëmijë të tjerë në maternitetin e AI, pasi i duhen bashkëpunëtorë.
Ai foli për krijimin e zyrtarëve të rinj të prodhuar nga Inteligjenca Artificiale, të cilët i quajti “fëmijët e Diellës”. Më konkretisht, Rama paralajmëroi përdorimin e ndërmjetësimit me Inteligjencë Artificiale për çështjet civile, me synimin për të shmangur zvarritjet në gjykata dhe kostot për qytetarët.
“Duhet të mendojmë për ndërmjetësimin me Inteligjencë Artificiale të çështjeve civile, që njerëzit mos harxhojnë lekë e kohë nëpër procese të pafundme kur fare mirë mund të kalojnë në procesin e ndërmjetësimit të fëmijëve që Diella do ketë së shpejti. Teknologjia dhe Inteligjenca Artificiale janë bekimi i vendeve në zhvillim. Sepse bëjmë kapërcime që nuk kurrë nuk do t’i bënim në kushtet e procesit linear.
Sot bëhet diskutimi se si ka mundësi, ca është ky provokim, mëkat, ca është kjo çmenduri. Ministër shteti jo njeri. Unë mendoj që në një kohë me të shkurtër, Ministri jo njeri nëpër qeveri do jetë një normalitet. Do vijë shumë shpejt. Ne mund ta bëjmë dhe mund të jemi të shpejtë në procese që lidhen me AI, për të arritur ti shërbejmë shumë më mirë publikut. Diskutohet sot si do vjedhë Diella. Kur je hajdut aty të rri mendja si do vjedhë ai tjetri atë gjën qe ti do ta vjedhësh për vete por s’të bie rruga andej. Si shkon mendja një njeriu normal, por vetëm atyre që kanë vjedhur, ose do vidhnin nëse do i caktonte njeri në vend ta Diellë.
ë dy faza ka dobësi, e para janë termat e referencës që mund të bëhen të orientuar siç ishte një tender epik para se të merrnim detyrën, ku për të bërë tunel ishte vënë kriter të ketë eksperiencë edhe në sisteme muzikore, dhe natyrisht i shkon dikujt që ka instaluar foninë në ndonjë miting dhe e dyta tek gjykimi mbi dokumentet, jo s’ma ke sjellë letrën në kohë, jo sa punonjës ke.
Atëherë tek termat e referencës, Diella e bën të pamundur trajtimin prefrencial të dikujt dhe ata që merren me këtë po punojnë. Të gjithë dokumentat që bëjnë kompanitë dhe i mbledhin, janë fakte publike në Republikën e Shqipërisë, sa punonjës kanë, sigurimet, sa xhiro ke, sa makineri ke.
Diella do i mbledhë vetë në mënyrë uniforme, s’ka nevojë të shkojnë nerëzit lart e poshtë. Dhe në fund është oferta. Oferta flet vetë, ashtu sikundër të gjitha kriterët e cilësisë, askush se gjykon dot më objektivisht se AI. Do duhen dhe disa bashkëpunëtorë të Diellës jo njerëz, që jemi shumë besimplote, Diella do ti lindë në maternitetin e AI.” – tha Rama.
