Agron Polovina – Një jetë në shërbim të artit, trashëgimisë dhe brezit të ri
Intervista u realizua nga Drejtuesi dhe Themeluesi I Galerise se Artit TERAVARNA, me qëndër në Los Anxhelos, USA, Dr. Niladri Sarker, I cili pergjatë visitës së tij të parë vizitoi disa qytete, dhe disa studio artistësh, dhe në të ardhmen do mund të vizitojë e takojë akoma më shumë artistë shqiptarë te cilët i fton për bashkepunime në fushën e artit dhe promovimit.
Intervistë ekskluzive me Galerinë Ndërkombëtare të Artit “Teravarna”
Në qytetin e vjetër të Beratit, ndër rrugicat e kalldrëmta dhe shtëpitë e bardha karakteristike, ndodhet studioja dykatëshe e artistit Agron Polovina – një hapësirë ku tradita, peizazhi dhe pasioni bashkëjetojnë në qetësi dhe përkushtim. Me një përvojë disa dekadëshe si artist, pedagog dhe restaurator, Polovina është një zë I veçantë në artin shqiptar, I lidhur ngushtësisht me qytetin e tij dhe me zhvillimet bashkëkohore në pikturë.
➢ “Artin e nisa që në fëmijëri,” – kujton ai. Vizatimet e para u vunë re nga mësuesit dhe shokët në shkollë, dhe që prej asaj kohe nuk ka ndalur së kërkuari. Pas përfundimit të Liceut Artistik dhe Institutit të Lartë të Arteve në Tiranë, ai vendosi të kthehej në Berat, për të punuar si mësues në shkollën e artit dhe për të qenë pranë burimeve të frymëzimit të tij: lagjet historike, peizazhet, ikonat dhe monumentet e qytetit.
Gjeneratat e reja dhe arti sot
Teravarna: Si e shihni sot gjeneratën e re të artistëve në Shqipëri?
Agron Polovina: Artistët e rinj kanë një fat të madh që ne nuk e kishim: liri, qasje të menjëhershme në informacion dhe mundësi për t’u lidhur me botën. Këshilla ime është të jenë të sinqertë me vetveten, të mos imitojnë, por të kërkojnë identitetin e tyre artistik. Të investojnë kohë dhe pasion në atë që bëjnë.
Trashëgimia shpirtërore dhe ndikimi në krijimtari
Pas viteve ’90, me ndryshimin e sistemit, Polovina u shkëput nga arsimi dhe iu përkushtua restaurimit të ikonave pasbizantine, duke punuar me vepra të mjeshtrave si Onufri. Ky kontakt I drejtpërdrejtë me trashëgiminë shpirtërore të artit shqiptar ndikoi thellësisht në zhvillimin e mëvonshëm të cikleve të tij pikturale, ku përzihen struktura ikonografike me gjuhën e lirë të pikturës moderne.
Veç punës në studio, Polovina ka udhëhequr për shumë vite lëvizjen e artistëve të peizazhit në Shqipëri.
➢ “Përmes pikturës plein-air kemi udhëtuar në çdo cep të vendit, në çdo stinë. Kjo është një mënyrë jetese dhe një formë e thellë lidhjeje me vendin,” – thotë ai.
Veprat e tij ndodhen sot në koleksione publike dhe private, në Shqipëri dhe jashtë saj – duke përfshirë Galerinë Kombëtare të Arteve, galeri lokale dhe koleksionistë ndërkombëtarë.
Teravarna, arti ndërkombëtar dhe bashkëpunimet e ardhshme
Teravarna: Si e shihni rolin e Galerisë Teravarna dhe çfarë do të dëshironit të ndodhte në të ardhmen?
Agron Polovina: Teravarna është një platformë e rëndësishme që u jep artistëve nga çdo vend një mundësi reale për të udhëtuar dhe për t’u bërë të njohur ndërkombëtarisht. Do të ishte shumë pozitive që një përzgjedhje e artistëve më të talentuar shqiptarë të ftoheshin në ekspozitat apo konkurset që organizoni. Do të ishte një mbështetje e madhe për gjeneratën e re që ka uri për hapësirë dhe përvoja ndërkombëtare.
Në këtë frymë bashkëpunimi, artisti vlerëson lart ndërmjetësimin e artistes Blerina, e cila e prezantoi me aktivitetin e Galerisë Teravarna.
➢ “Është bukur që një galeri me qendër në Los Anxhelos bashkëpunon me artistë nga mbi 60 vende. Kjo është vetë filozofia e artit – të mos mbetet në studio, por të udhëtojë, të komunikojë,” – thekson ai.
Teravarna: A do të ishit I hapur për të ekspozuar në ndonjë nga ekspozitat tona fizike në SHBA apo Europë?
Agron Polovina: Absolutisht po. Nëse krijohen mundësitë për transport dhe pjesëmarrje, do të ishte kënaqësi për mua që të prezantoja punën time në skenën ndërkombëtare përmes Galerisë Teravarna.
Teravarna: Faleminderit Agron për mikpritjen dhe këtë intervistë të pasur.
Agron Polovina: Faleminderit juve për vizitën dhe për mundësinë për të ndarë punën dhe vizionin tim. Jeni të mirëpritur ne çdo kohe, dhe ju uroj suksese në misionin tuaj./infopressalbania (B.Llalla)/
