Lëvizja e Legalitetit, përmes kreut të saj, z. Shpetim Axhami, ka përkujtuar figurën e Dr. Fuad Salih Myftisë, patriot nacionalist, antikomunist dhe drejtues për shumë vite i kësaj force politike, i cili u nda nga jeta më 10 shkurt 2007.
Dr. Fuad Salih Myftia lindi më 28 korrik 1924 në Shkodër, në familjen e njohur të Myftijëve, si bir i Kryemyftiut të Shkodrës dhe Kosovës, Salih Efendi Myftiu. Që në moshë të re u angazhua në aktivitetin antifashist, për çka u arrestua në shtator të vitit 1943. Më pas, së bashku me të atin, iu bashkua njësive luftarake zogiste në Shkodër.
Pas largimit nga Shqipëria më 28 nëntor 1944, Dr. Myftia u vendos fillimisht në Itali, ku kreu studimet universitare në Universitetin e Firences në degën e drejtësisë, duke përfunduar edhe doktoraturën në vitin 1951, me bursë të Mbretit Zog I. Në vitin 1958 u vendos përfundimisht në Shtetet e Bashkuara të Amerikës, ku për gjashtë mandate radhazi drejtoi Partinë Lëvizja e Legalitetit në diasporë.
Pas rënies së regjimit komunist, në fund të vitit 1991, ai u kthye në Shqipëri për të kontribuar në rikrijimin e Legalitetit, ndërsa në vitin 1993 u zgjodh Kryetar i Këshillit Kombëtar të kësaj force politike.
Gjatë gjithë jetës së tij, Dr. Fuad Salih Myftia mbeti besnik i idealeve zogiste, duke iu përkushtuar familjes, kombit, atdheut dhe institucionit të Mbretërisë Shqiptare. Ai u nda nga jeta në moshën 83-vjeçare në New York dhe u varros me nderime në varrezat e Queens-it, përkrah figurave të shquara të Legalitetit si Abaz Kupi dhe Abedin Mulosmani.
Në ditën e lamtumirës së fundit, familja Myftiu dhe miqtë e tij morën një telegram ngushëllimi nga Naltmadhëria e Tij, Mbreti Leka Zogu I, i cili vlerësonte kontributin e Dr. Myftisë si një legalist besnik dhe luftëtar të vendosur antikomunist, duke e cilësuar humbjen e tij si një humbje të madhe për çështjen kombëtare dhe Mbretërinë Shqiptare.
Figura e Dr. Fuad Salih Myftisë mbetet një nga shtyllat historike të Legalitetit dhe një emër i respektuar në historinë e rezistencës antikomuniste shqiptare.
