Kryetari i Partisë Lëvizja e Legalitetit, Shpëtim Axhami, ka dalë me një qëndrim të fortë dhe të drejtpërdrejtë në mbrojtje të identitetit kombëtar shqiptar, duke kërkuar heqjen e toponimeve sllave në Shqipëri dhe rikthimin në fuqi të Ligjit të Mbretërisë Shqiptare të datës 5 maj 1937, i cili synonte pastrimin e hartës shqiptare nga emërtime të imponuara me dhunë historike.
Në një reagim publik me ngarkesë të lartë historike dhe kombëtare, Axhami e cilëson këtë çështje si një padrejtësi historike ende të pazgjidhur, duke theksuar se toponimia sllave nuk është një rastësi, por rezultat i një strategjie të qëllimshme për deformimin e identitetit shqiptar ndër shekuj.
Postimi i plotë i Shpëtim Axhamit:
“Të hiqen toponimet sllave në Shqipëri, duke rikthyer Ligjin e Mbretërisë Shqiptare të datës 5 maj 1937 për këtë çështje!
Në mesin e shekullit të XIV, në të gjitha hapësirat shqiptare, nga veriu në jug, u imponuan me dhunë emërtime sllave për krahina, qytete, fshatra, lagje dhe lumenj. Kjo ishte një strategji e qëllimshme për shuarjen e identitetit shqiptar dhe zëvendësimin e tij me elementë sllavë.
Përballë këtij realiteti historik, më 5 maj 1937, gjatë periudhës së Mbretërisë Shqiptare, shteti shqiptar miratoi një ligj të posaçëm për ndryshimin e emrave sllavë të disa qyteteve, fshatrave dhe lagjeve, me synimin për të rikthyer toponiminë kombëtare dhe trashëgiminë autoktone shqiptare.
Fatkeqësisht, ky ligj u abrogua pas pushtimit të Shqipërisë nga Italia.
Pas vitit 1944, për shkak të dakordësive politike të regjimit komunist me Jugosllavinë, ky ligj nuk u rikthye më kurrë në fuqi, duke lënë të pandryshuar një pjesë të rëndësishme të trashëgimisë sonë historike, të deformuar përmes këtyre toponimeve.
Prandaj, duke u nisur nga rëndësia historike e sovranitetit dhe identitetit tonë kombëtar, kjo padrejtësi e vendosur me dhunë duhet të zhbëhet. Për këtë arsye, duhet të rikthehet Ligji i Mbretërisë Shqiptare i datës 5 maj 1937.
Rikthimi i së vërtetës historike mbetet një detyrë ende e papërmbushur.”
#HistoriaShqiptare #Toponimia #IdentitetKombëtar #EVertetaHistorike
Ky qëndrim i Shpëtim Axhamit vlerësohet si një veprim i duhur dhe një nismë e qartë atdhetare, që ngre sërish në vëmendje një temë të lënë në harresë për dekada me radhë. Rikthimi i toponimisë autoktone shqiptare nuk është thjesht një akt administrativ, por një akt sovraniteti, dinjiteti dhe vetëdijeje historike.
Në një kohë kur identitetet kombëtare sfidohen dhe relativizohen, thirrja e Axhamit shërben si një zgjim i ndërgjegjes kombëtare, duke kërkuar që shteti shqiptar të përballet me të shkuarën dhe të korrigjojë padrejtësitë e trashëguara.
Toponimia nuk është vetëm emër në hartë – ajo është kujtesë, histori dhe identitet. Dhe rikthimi i saj i vërtetë mbetet një borxh ndaj brezave që vijnë.
