Në kuadër të 125-vjetorit të ndarjes nga jeta të poetit të madh të Rilindjes Kombëtare, Naim Frashëri, Qendra Kulturore “Aleksandër Moisiu” në Durrës organizoi një aktivitet përkujtimor me pjesëmarrjen e studiuesve dhe dashamirësve të letërsisë shqipe. E ftuar speciale në këtë veprimtari ishte prof. as. dr. Rovena Vata Mikeli, punonjëse shkencore pranë Departamentit të Studimeve Letrare, në Institutin e Gjuhësisë dhe të Letërsisë, Akademia e Shkencave e Shqipërisë.
Në këtë aktivitet, prof. as. dr. Vata Mikeli mbajti kumtesën me titull “Naim Frashëri në letrat shqipe”, ku solli në vëmendje figurën shumëdimensionale të poetit kombëtar, duke e trajtuar atë si themelues të gjuhës letrare shqipe, si poet filozofik e atdhetar, dhe si figurë kyçe e Rilindjes Kombëtare.
Në kumtesën e saj, ajo theksoi se në krijimtarinë e Naim Frashërit bashkëjetojnë miti dhe historia, etnosi dhe qytetërimi, ndjenja patriotike dhe estetika e së bukurës. U vu në dukje gjithashtu kontributi i çmuar i poetit në letërsinë për fëmijë, ku përmes vargut dhe prozës shqipe përcillen mesazhe universale për edukimin dhe botëkuptimin e brezave të rinj.
Prof. as. dr. Vata Mikeli nënvizoi se Naim Frashëri, si mendimtar idealist dhe panteist, e ka lidhur ngushtë veprën e tij me përparimin shpirtëror, kulturor dhe kombëtar të shqiptarëve. Figura e tij vazhdon të jetë frymëzim për shoqërinë shqiptare edhe sot, ndërsa vepra e tij mbetet themel në historinë e letrave shqipe.
Aktiviteti u mbyll me një homazh të përbashkët për kujtimin e poetit kombëtar, duke rikujtuar mesazhin dhe vlerat që Naim Frashëri i dha letërsisë, kulturës dhe kombit shqiptar.
