Shpetim Axhami, kryetar i PLL
23 Gushti – Dita Europiane e Kujtesës për Viktimat e Regjimeve Totalitare
Në Shqipëri, në lidhje me dënimin e krimeve të komunizmit dhe të atyre që i projektuan më së keqi këtu tek ne këto krime, dështuam, dështuam sepse nuk kujtuam, por shpejt harruam, nuk vlerësuam dhe respektuam viktimat e komunizmit dhe nuk i dënuam kurrë krimet e tij, prandaj dhe rrezikohemi…
Më 23 Gusht 1939 u nënshkrua Pakti famëkeq Ribbentrop–Molotov (nazist–stalinist), i cili i hapi rrugën Luftës së Dytë Botërore. Luftë e cila pasi solli miliona viktima bëri që Evropa Lindore ra nën kthetrat e diktaturave komuniste, duke prodhuar dhimbje, vuajtje e krime të llahtarshme.
Shqipëria, për fat të keq, u kthye në një shtet-burg të ndërtuar mbi terror, dhunë, frikë dhe izolim total.
1-Rreth 7 mijë qytetarë u pushkatuan nga regjimi komunist.
2-Rreth 1 mijë të burgosur humbën jetën në qelitë e ferrit.
3-Rreth 6 mijë të tjerë vdiqën në kampet e internimit dhe punës së detyruar.
4-Janë kryer mbi 1 milion vite burg nga 34 mijë të burgosur politik.
5-Mbi 59 mijë qytetarë u internuan, duke u detyruar të punonin në kushte çnjerëzore.
6-Shqipëria kishte mbi 100 burgje dhe kampe përqendrimi, simbole të një regjimi gjakatar!
Edhe sot, pas 35 viteve nga rënia e diktaturës, mbi 4.500 viktima të pushkatuara ende nuk kanë një varr. Askush nuk u gjykua, askush nuk kërkoi falje, dhe krimet e komunizmit kurrë nuk u dënuan. Ligji i lustracionit nuk u zbatua, ish-funksionarët dhe bashkëpunëtorët e Sigurimit vazhduan të qëndrojnë në pushtet.
Shumë prej disave që “përfaqëfuan” demokracinë pas viteve ‘90 vetëm e njollosën atë dhe çuditërisht u veshën më shumë se kushdo tjetër me pushtet, ndërsa ish-të përndjekurit politikë kurrë nuk u integruan si duhet dhe nuk morën atë që meritonin.
Kjo tregon jo vetëm padrejtësinë e së shkuarës, por edhe dështimin e shtetit për të shëruar sadopak një pjesë të plagëve të regjimit totalitar komunist në Shqipëri.
Asnjëherë nuk është vonë!
Koha kërkon një reagim të bashkuar dhe një organizim të çdo faktori të djathtë, vetëm kështu mund të rivendosim drejtësinë historike dhe të çlirojmë Shqipërinë nga trashëgimia komuniste dhe pseudodemokracia që mban peng të ardhmen e vendit.
Vetëm kështu mund të arrihet ajo që duhet!
1-Dënimi ligjor i krimeve të komunizmit dhe atyre që i shkaktuan këto krime.
2-Caktimi zyrtar i një Dite Kombëtare të Kujtesës për Viktimat e Komunizmit.
3-Ndërtimi i një memoriali kombëtar dhe një parcele për të zhdukurit e diktaturës.
4-Krijimi i Muzeut të Kujtesës së Krimeve të Komunizmit.
5-Rritja e buxhetit shtetëror për kërkimin e eshtrave të të zhdukurve.
6-Studimi i krimeve të komunizmit në tekstet shkollore, për edukimin e brezave të rinj dhe ndalimi me ligj i përdorimit të çdo simboli të tij.
7-Pastrimi i institucioneve shtetërore nga individët e lidhur me krimet e diktaturës dhe ish-sigurimin e shtetit.
8-Përfundimi i procesit të dëmshpërblimit të ish-të përndjekurve brenda 5 viteve.
9-Identifikimi dhe nderimi i plotë i viktimave të komunizmit.
Regjimet totalitare vijnë gjithmonë në emër të popullit, propogandohen në emër të tij, por përfundojnë duke shtypur dhe skllavëruar popullin.
Sot, në Ditën Europiane të Kujtesës për Viktimat e Regjimeve Totalitare, përulemi me nderim përpara kujtimit të mijëra shqiptarëve të vrarë, torturuar dhe të zhdukur nga diktatura komuniste.
🇦🇱 Kurrë më komunizëm në Shqipëri!
