Nga Ermal SPAHIU
U bë kohë që se ndez më televizorin. Qëndron aty, përballë krevatëve dhe tryezës, si një statujë formale. Edhe pse ndjej keqardhje kur mendoj se nuk e përdor për asnjë funksion të vetëm, sërish them me bindje se është veprimi i duhur, për aq kohë sa pas atij ekrani të zi, fshihen njëmijë e një të zeza dhe asnjë e bardhë. Unë jam mësuar me vlerën, kulturën, të vërtetën, risitë, surprizat, argëtimin dhe e di shumë mirë që këto veçori nuk do më ofrohen nëse marr telekomandën dhe shtyp butonin që ‘i jep jetë’ ekranit të zi. Kjo sepse përballë do më ndillen ngjarje, kronika dhe emisione të cilat bëjnë të kundërtën e asaj me të cilën jam mësuar e kjo nuk më shërben, veçsa më dëmton. U mendova gjatë pasi i rashë rreth e rrotull dhomës me ekranin e fikur dhe në fund u ula në ballkon. Fillova të mendoj si qytetar, e mandej si gazetar. Më erdhën një varg mendimesh dhe shkruajta çfarë më erdhi në një copë letër që e kisha me vete.
Mediat:
I duan lajmet e verifikuara, por u bëjmë jehonë atyre të fabrikuara.
Duan lajmin e parë, por ngutja çon në dezinformim.
Duan shikueshmërinë, por askush nuk ia di përmbajtjen.
Duan thyerjen e rekordeve, por e vetmja gjë që dinë është të shesin imazh.
E duan të vërtetën, por e asfaltojnë me propagandë.
Duan të bëhen syri i publikut, por njërin e qërruan me censurë.
E duan zërin të bërtitet, por e kanë mbytur me linçim.
Duan të informojnë, por e qajnë reklamën duke e pompuar me frymëmarrje artificiale.
Duan të bëhen urë me qytetarin, por në anën tjetër ngrenë murin që të fshihet e vërteta.
I duan zhvillimet, por oreksin e mbushin me klikimet.
Bëjnë shumë për kujtesën, por filmojnë shkatërrimin.
Mediat sot mision kanë të parën, por devijojnë tek e dyta.
Më ngjau e gjitha një lojë matematike në fund ku kalkulimet provonin gjithmonë të kundërtën. Asnjë teoremë s’ia doli të mposhte argumentet e mia se diçka mund të ndryshojë. X-i u bë problematik, çdo vlerë u përpjesëtua dhe çdo antivlerë m’u shumëzua.
Si përfundim, lashë gjithçka dhe nisa rutinën e zakonshme. Fundja kështu mund ti vë në zbatim rregullat e mia.
