Editorial nga Sokol Gjoni
Me 11 maj 2025, Shqipëria u zhyt edhe një herë në farsën e radhës zgjedhore – një proces që kishte më shumë ngjashmëri me një shfaqje të kontrolluar sesa me një garë të lirë demokratike. Votimi i deformuar, presioni mbi administratën publike, përdorimi i burimeve shtetërore dhe presioni sistematik mbi votuesit ishin pjesë e një skenari që nuk prodhoi legjitimitet, por thelloi mosbesimin dhe për pasojë krizën politike.
Në këtë kontekst, kryeministri Edi Rama ka zgjedhur të ndërmarrë një tjetër farsë: atë të “shkarkimeve të mëdha”. Me një zell të nxituar, po hiqen drejtorë në disa bashki – gjoja për të reflektuar pasojat e votës. Por në të vërtetë, kjo është një lëvizje e orkestruar për të hedhur fajin tek të tjerët dhe për të shmangur përgjegjësinë kryesore: modelin e tij të qeverisjes së kapur nga interesat klienteliste.
Askush nuk e beson më këtë teatër. Shqiptarët nuk kanë më nevojë për ndryshime emrash në poste, por për një ndryshim të sistemit. Opozita duhet ta bëjë të qartë: farsat zgjedhore nuk fshihen me shkarkime. Demokracia nuk rindërtohet me propagandë, por me transparencë, garë reale dhe respekt për votën e lirë. Ndryshe, çdo “reformë” nga lart është thjesht një mashtrim i ri i një pushteti të vjetër.
