BERAT – Ditën e martë, më 24 qershor 2025, në orën 11:00, në ambientet e Galerisë “Edward Lear”, u çel edicioni i shtatë i ekspozitës vjetore të grupit të njohur artistik “MURI”. Ky edicion mblodhi së bashku një grup të zgjedhur artistësh shqiptarë, mes të cilëve emra të njohur si: Adrian Devolli, Arben Meksi, Agron Polovina, Fatmir Minga, Fatmir Tufina, Idriz Balani, Luan Boriçi, Llambrini Dëna, Marjana Goxhabelliu, Violeta Kongo, si dhe dy artistët e ftuar: Nasuf Myftari dhe Arjan Kalari.
Ekspozita i kushtoi një homazh të veçantë piktorit Leon Çika (in memoriam), një figurë e rëndësishme e artit shqiptar, i cili ka qenë pjesë e grupit ndër vite.
Të gjitha veprat e ekspozuara janë realizuar enkas për këtë ngjarje dhe përfaqësojnë një shumësi gjinish artistike dhe konceptimesh moderne e bashkëkohore, duke dëshmuar gjallërinë, angazhimin dhe dialogun e vazhdueshëm të grupit “MURI” me realitetin dhe zhvillimet e artit vizual në Shqipëri.
Ekspozita mbetet e hapur për publikun për disa ditë, duke ofruar një mundësi të veçantë për të apasionuarit pas artit që të njohin nga afër punën e këtyre krijuesve të spikatur të skenës shqiptare të artit pamor.
