KAS vendosi të ndalojë hyrjen e Asllan Dogjanit në Pallatin e Sportit “Farie Hoti” pas incidenteve të ndodhura këtë të hënë.
Dogjani pas incidenteve të shënuara me anëtarët e KAS u largua nga salla ndërkohë që anëtarët e KAS firmosen shkresën që ndalon hyrjen e tij në ambientet e Pallatit të Sportit “Farie Hoti”.
Deri në përfundim të procesit të rinumërimit Asllan Dogjanit i ndalohet të futet në ambientet e Pallatit të Sportit “Fahrie Hoti”, por këtë rregull demokrati e shkeli pak çaste më vonë. Demokrati sfidoi KAS dhe policinë, duke u futur sërish në sallën e rinumërimit.Dogjani pretendon për vjedhje votash, ndërsa anëtari i KAS Ilir Rusmali iu përgjigj duke thënë se do të thërrasë policinë. Mirëpo, kjo duket sikur e agravoi më tej situatën, pasi Dogjani përdori fjalë të papërshtatshme.
Ai “kërcënon” se do të shkojë në SPAK, teksa thotë se i kanë marrë shumë vota deri më tani me këtë pretendim. Më pas ai i drejtohet anëtarit të KAS, Ilir Rusmali duke i thënë se duhet t’i vijë turp, që i shpalli votën e pavlefshme. “Jo numërues demokrat të jetë, po vëllai im të jetë”, thotë ai.
Pas përplasjes me anëtarët e KAS, deputeti Asllan Dogjani është nxjerrë jashtë nga forcat e policisë. Në një deklaratë për mediat ai akuzon kryeministrin Edi Rama se është kapur nga mafia dhe ka shitur interesat e qytetarëve.
“Shikoni se çfarë diktature! Shqipëria po merr fund. Popull çohuni në këmbë të zhdukim hajdutët, të zhdukim ata që po kthejnë vendin në diktaturë Rama është marrë peng nga mafia kombëtarë e ndërkombëtare dhe ka shitur interesat e qytetarëve dhe sot mundohet të na mbyllë gojën ne që duam të vendosim drejtësi për të drejtën e votës”, shprehet Dogjani.
Ai akuzoi KAS se vepron me dy standarde.
